back

कविता : पत्नी विनाको घर

वि.सं.२०८१ असार १ शनिवार

651 

shares
RBB AD
NTC AD
Rastriya Swastha Sikshya Suchana Tatha Sanchar Kendra

कल्पना अधिकारी भट्टराई, काठमाडौं

झुक्याएर भइन् तिरोहित प्रिया एक्लो भयो जीवन ।
मायाजाल छुट्यो भइन् अब खुला तोडी सबै बन्धन ।
गर्थिन् छम्छम भित्र बाहिर हिजो छैनन् विलाइन् पर ।
लाग्यो शून्य मसान–घाटसरिको पत्नी विनाको घर ।१।

उठ्थिन् नित्य सबेर कर्म पथमा लाग्थिन् रमी दैनिक ।
मेरो यो मुटु धड्किँदै छ अहिले बेजोडले धक्धक ।
चक्का एक गयौ भयो रथ ठुटो यो जिन्दगी धर्मर ।
लाग्यो शून्य मसान–घाटसरिको पत्नी विनाको घर ।२।

आमा छिन् घरमा अशक्त बिचरा बेहाल बेहाल छ ।
पक्षाघात भएर मुर्छित कठै ! सन्ताप सन्त्रास छ ।
हेर्दा हाल खराब देख्छु उनको,रुन्छिन् मुमा धर्धर ।
लाग्यो शून्य मसान–घाटसरिको पत्नी विनाको घर ।३।

छैनन् आज सँगै पलायन भए सन्तान अष्ट्रेलिया ।
प्यारी चस्चस घोच्छ यो हृदयमा तड्पिन्छ मेरो हिया ।
हेर्दै छन् गहना, दराजभरिका सारी, चुरा, सिन्दुर ।
लाग्यो शून्य मसान–घाटसरिको पत्नी विनाको घर ।४।

सोध्छन् सोध्न त पुत्रले दिनदिनै कस्तो छ बाबा भनी ।
चिन्ता गर्न हुँदैन है हजुरले, यस्तै त हो जीवनी ।
देख्दैनन् तिनले उदास दिलमा आगो बलेको तर।
लाग्यो शून्य मसान–घाटसरिको पत्नी विनाको घर ।५।

मेसो छैन कता छ चामल, जिरा बेसार भान्सातिर ।
दिथ्यौ खान अनेक व्यञ्जनहरू खान्थेँ नमानी पिर ।
आफन्तीसँगको मिलाप गहिरो राख्थ्यौ सधैं सुन्दर ।
लाग्यो शून्य मसान–घाटसरिको पत्नी विनाको घर ।६।

कस्तो स्वस्थ थियो शरीर पहिले ऊर्जा थियौ साथमा ।
आँखा टिल्पिल गर्दछन् शिव हरे अत्यासले रातमा ।
गर्दा काम थकान हुन्छ अहिले घट्दै गयो जाँगर ।
लाग्यो शून्य मसान–घाटसरिको पत्नी विनाको घर ।७।

जोडी ढुक्कुर झैँ भएर घरमा मिल्थ्यौ झगड्थ्यौँ पनि ।
मान्थ्यौँ जे जति छन् सबै चलन ती संस्कार हाम्रा भनी ।
साक्षात् रूप थियौ उमा हृदयको खाली भयो मन्दिर ।
लाग्यो शून्य मसान–घाटसरिको पत्नी विनाको घर ।८।

छन्द : शार्दूलविक्रीडित
गण : म स ज स त त गु
गण सङ्केत : SSS  llS  lSl  llS  SSl  SSl  S

 

वि.सं.२०८१ असार १ शनिवार ०८:२२ मा प्रकाशित

NLIC AD
NABIL bank AD
ADBL AD
तीनसय चारमध्ये मदन पुरस्कारका लागि  छानिय यी पाँच कृति

तीनसय चारमध्ये मदन पुरस्कारका लागि छानिय यी पाँच कृति

काठमाडौँ । मदन पुरस्कार गुठीले ‘मदन पुरस्कार २०८०’ का लागि...

लघुकथा : तरकारीको स्वाद

लघुकथा : तरकारीको स्वाद

मुरारीराज मिश्र, कुमारीगाल, काठमाडौं ’तिमीले पकाएको तरकारीको स्वाद किन यत्ति...

लघुकथाः अपकृत

लघुकथाः अपकृत

मनीषकुमार शर्मा ‘समित’ मध्यपुर ठिमी, भक्तपुर पितृलोकमा मातृपितृ आत्माहरू उत्साहमा...

कविता : जीवन बुझ्नै गाह्रो छ

कविता : जीवन बुझ्नै गाह्रो छ

विदुर अधिकारी, रामपुर, चितवन शान्ति धरामा, भाग्दै छ क्रोध असाध्यै,...

मु्क्तक

मु्क्तक

बाबुराम न्यौपाने 'उत्स'दमक, झापा १. लेखक साहित्यकार नत कार्यकर्ता नत...

सुसेली

सुसेली

उत्तम शर्मा 'दर्शन' पाँचखाल, काभ्रे १ युवा जोसमा गरौं काम...