Sansar News
कपिल किशोर घिमिरे, दाङ
मन रुँदै छ तन छ किन्तु खुब रमाएजस्तो
घर उही छ रङ नयाँ देखिन्छ लाएजस्तो
गेरु बस्त्र भिर्छ उसले काम गर्दै चोरी
ढोङ गर्दै हिँड्छ साँच्चै ज्ञान पाएजस्तो
गर्दछन् नेता कुरा खुब काम हुन्नन् केही
लाग्छ तिनकै मात्र पालो खास आएजस्तो
राष्ट्रको धन चोर्दछन् जो जेल भोग्छन् तिनले
गर्दछन् खै किन हो कारा मन पराएजस्तो
स्वार्थ आफ्नो गर्न पूरा लाग्दछन् जो मानिस
चाकरीमा गर्दछन् ती शिर झुकाएजस्तो
बहर : रमल मुसम्मन अवतर
अर्कान : फाइलातुन् फाइलातुन् फाइलातुन् फैलुन्
वजन : २१२२ – २१२२ – २१२२ – २२
वि.सं.२०८१ भदौ ८ शनिवार ०५:३६ मा प्रकाशित
