हामी सबैकाे संसारन्यूज

दाहाल कल्पना, रातोपुल, काठमाडौं

१.
जिन्दगीभर दुख गर्छौ केका लागि
मागीमागी झोला भर्छौ केका लागि
थाहा छ आज कि भोलि आखिर धुवाँ
सहयोग गर्न पछि सर्छौ केका लागि ?

२.
रूप यौवन छपक्क देख्दा फैलाउँछौ अङ्गालो
अतीतका पाना सबुत खोज्दै पार्छौँ मोटो सङ्गालो
चुस्छौ फूल मौरीलेझैँ बनाउँछौ निचोरेको कागतीझैँ
जोवन मासिदै गएपछि खोजी हिड्छौ भङ्गालो ।

३.
राम्रो मूर्ति कुँध्न पनि खँदिलो शिला चाहिन्छ
सुगन्धित फूल फुल्न त्यस्तै कोपिला चाहिन्छ
मानसिक द्वन्द्व किन प्राकृतिक नियमलाई
स्वस्थ फल फल्नलाई स्वस्थ चिचिला चाहिन्छ ।

४.
आज सानी भान्सा पसी चर्को कति मिठो
हिजो अस्ति छोगडा मिस्री हुन्थ्यो सारै तितो
आफ्नो पार्टी आफ्नो नेता जता ऊ छ सबै तेता
सयघण्टा पनि अचेल एक दिनभन्दा छिटो ।

५.
सङ्घर्ष गर्दै पाखुरी चलाए जीत हुन्छ
मानवताले दानवता जलाए जीत हुन्छ
विवेकको खुकुरीले रिस डाह छल्न सके
बुद्धिमा लागेको बिर्को ढलाए जीत हुन्छ ।