हामी सबैकाे संसारन्यूज

बिमला चन्द सानू
बैतडी हाल : काठमाडौं

हाम्रो सुन्दर देश यो कहरमा पर्दैछ रातादिन
चिन्ता छैन अझै यहाँ मुलुकको लाग्दैन माया किन
लाखौं लाख युवा विदेश रहँदा काटिन्छ मेरो मन
पुर्खाका सपना यसै डढिँरहे पोल्दैछ आत्मा तन ।१।

भ्रष्टाचार भयो यहाँ सहजले व्यापार गर्ने थलो
थाले बेच्न जवान रक्त पसिना हुन्थ्यो र खै के भलो
सानो काम गराउन भनसुनी गर्दा नबन्ने भयो
माथीबाट लिएर आज तकमा जालो बनेको छ यो ।२।

कस्ता हाकिम छन् विभिन्न दलका आफ्नै त हो जागिर
राम्रो काम म गर्छु भन्छ जसले झुक्छन् तिनैका शिर
यस्तै धुर्त छली भएर कपटी यो देश के उठ्छ र
सारा चोर धपाए मात्र अब लौ होला युवाको धर ।३।

राखौं लौ पहिलो भएर नभमा यो देशको चिन्तन
आफ्नै देश बने विदेश कहिले जादैन आफ्नो धन
आफ्नै पौरख कर्मले श्रम गरी पारौं धरा उर्वर
माटोमा सुन फल्छ है मुलुकको यो देश होस् निर्भर ।४।

जे जस्ता कुविचारका अयन हुन् फाल्दै बढौँ यो घडी
राम्रा सोच विकासका पथ लिई बढ्दै रहौँ झन् अघि
मेरो देश म भित्रको छ गरिमा हो देशको आवरू
चारैतर्फ बहार छर्न म सकूँ रक्षा स्वयंले गरूँ ।५।

छन्द : शार्दूलविक्रीडित
गण : म स ज स त त गु
गण सङ्केतः SSS llS lSl llS SSl SSl S

गजल