हामी सबैकाे संसारन्यूज

उत्तम विचार, नुवाकोट

हुन्न काम छल औ बलले त्यो
बन्छ काम जडको हलले त्यो ।
ज्ञानको परिधिभित्र अटाऔँ
बुद्धिले कलह दूर गराऔँ ।।१।

युद्ध हैन सबथोक नठानौँ
बन्छ जीवन निरर्थक जानौँ ।
सोच फेर्न अभियान चलाऔँ
बुद्धिले कलह दूर गराऔँ ।।२।

लड्छ मूर्ख नबुझेर कुयुद्ध
जित्छ युद्ध नलडेर प्रबुद्ध ।
द्वेषले मन त्यसै नजलाऔँ
बुद्धिले कलह दूर गराऔँ ।।३।

शान्ति फुल्छ जसको मनभित्र
लाग्छ मन्दिर समान पवित्र ।
युद्ध हैन अब बुद्ध भजाऔँ
बुद्धिले कलह दूर गराऔँ ।।४।

भाइभाइ छ विभक्त समाज
छैन चिन्तन विचार सुभाव ।
प्रेमले दिल जितौँ नलडाऔँ
बुद्धिले कलह दूर गराऔँ ।।५।

छन्द : स्वागता
गण : र न भ गु गु
सङ्केत : २१२ १११ २११ २ २