हामी सबैकाे संसारन्यूज

दीनानाथ पोख्रेल,इलाम

काव्यसाधना गर्दछन् कवि ।
रुग्ण भावना फेर्दछन् कवि ।।
सिर्जनाकला बोक्तछन् कवि ।
भ्रष्टताविषे ठोक्तछन् कवि ।।०१।।

चेतमा नयाँ शक्ति भर्दछन् ।
विश्वमा मिठो शान्ति छर्दछन्।।
कर्मका मिठा गीत गाउँछन् ।
कृत्य भावमा प्रीत लाउँछन् ।।०२।।

बाँड्दछन् सधैँ ज्ञानका कुरा ।
अन्धकार त्यो फाँड्न छन् छुरा ।।
आस बाँड्दछन् त्रास फाँड्दछन् ।
दम्भ फाँड्दछन् जोस बाँड्दछन् ।।०३।।

सभ्यता उँचो राख भन्दछन् ।
कृत्यका कला पस्क भन्दछन् ।।
भोक, रोग यी शत्रु मान्दछन् ।
कर्मका कला मित्र ठान्दछन् ।।०४।।

काव्यमा क्रिया दिव्य छर्दछन् ।
सौख्य वृद्धिको भाव भर्दछन् ।।
लौ न ए युवा ! देश बोक यो ।
भ्रष्ट शत्रु हुन् चक्कु घोप त्यो ।।०५।।

वाह्य दृष्टिमा सूर्य पूर्ण छन् ।
भित्र हेर्न यी काव्य गाउँछन् ।।
चिन्न सक्दछन् कृत्यका कला।
कर्म गर्दछन् विश्वकै भला ।।०६।।

छन्द – द्रुता
गण – र. य. ज. गु.
सङ्केत – SIS.  ISS.   ISI.   S.