हामी सबैकाे संसारन्यूज

दीनानाथ पोख्रेल, इलाम

बिहान साँझ खेतमा किसान छन् ।
टिपेर अन्न विश्वमा पठाउँछन् ।।
मुसुक्क हाँस्दछन् खुली सबै गरा ।
श्रमी बनी खटून् सदैव पाखुरा ।।०१।।

किसान हाँस्न पाउला कसो गरी ?
उपाय खोज्न बेर भो धरा भरी ।।
सबै धरा बनाउँदै हराभरा ।
श्रमी बनी खटून् सदैव पाखुरा ।।०२।।

दिऊँ सुप्राप्ति लोकमा गमीकन ।
छ यो मनुष्यमात्रको बडो धन ।।
भुली सुकर्म साधना नहून् कुरा ।
श्रमी बनी खटून् सदैव पाखुरा ।।०३।।

सबै उठी चिनौँ सुकर्म हो धन ।
सफा गरौँ सधैँ विचारले मन ।।
पलाउँछन् नयाँ उदात्त आँकुरा ।
श्रमी बनी खटून् सदैव पाखुरा ।।०४।।

विचार आउँछन् निका नयाँ जब ।
उठी सुकर्म खोज्छ चेतले तब ।।
उठूँ म यो हँसाउँदै वसुन्धरा ।
श्रमी बनी खटून् सदैव पाखुरा ।।०५।।

सुकर्म गाउँछौ भने उठ्यो जुनी ।
सफा विचार चेतमा रहोस् गुनी ।।
पुकार्दछिन् यही भनी वसुन्धरा ।
श्रमी बनी खटून् सदैव पाखुरा ।।०६।।

छन्द – विभावरी
गण – ज र ज र
सङ्केत -ISI  SIS  ISI SIS