Sansar News
भूपाल अधिकारी, विराटनगर
साफ सुग्घर दिल भएकी एक सानी मन पर्यो
मुस्कुराई चित्त हर्ने उनको बानी मन पर्यो
बन्न सक्छन् दैत्य साँच्चै रातमा मान्छेहरू
हो त्यसैकारण मलाई नव बिहानी मन पर्यो
लट्ठ पार्ने होस हर्ने जादूगर्नी हौ तिमी
टल्किएको चाँदझैँ तिम्रो जवानी मन पर्यो
राष्ट्रघाती सर्पजस्तै बन्न थालेका हुँदा
देश भन्दै ज्यान त्याग्ने स्वाभिमानी मन पर्यो
खुब अनौठो रम्य लाग्यो इन्द्रधनुषी दृष्य नै
मन तरङ्गित पार्न सक्ने घामपानी मन पर्यो
बहर : रमल मुसम्मन महजुफ
अर्कान : फाइलातुन् फाइलातुन् फाइलातुन् फाइलुन्
वजन : २१२२ – २१२२ – २१२२ – २१२
वि.सं.२०८१ चैत २३ शनिवार ०९:०१ मा प्रकाशित
