हामी सबैकाे संसारन्यूज

हरिभक्त सिग्देल ’ महेश’, काठमाडौं

।१।
शारीरिक छ यो मृत्यु आत्मा सत्य सनातन
मान्नु स्वीकार्नु नै पर्छ छन् यी अमर जीवन ।
संस्कार धर्म मान्छेका प्रचलनहरू सबै
पुस्तान्तरण यी हुन्छन् यथार्थ छैन सत्य है ।।

।२।
मृत्यु शरीरको हुन्छ आत्मा अमर कञ्चन
हुन्न काज क्रिया केही अमर आत्मरञ्जन ।
मृत्यु समयको स्थान प्रचलन भएपछि
सद्गत जसरी गर्छौ गरे हुन्छ ढलेपछि ।।

।३।
आत्मा अमर हो भन्ने बुझे मुक्त भई गयो
आत्मा यस्तो नमान्ने ऊ डर्ने मर्ने भई गयो ।
पुरानो वस्त्र त्यागेझैँ त्याग्नु शरीर सत्य छ
मर्दैन आत्मा यो सत्य शरीर आत्म भिन्न छ ।।

।४।
परिवार सबै नातागोता प्रेम भएजति
गर गर्नु सके सप्पै जीवितमै रहेजति ।
श्रद्धा दुःख छ यो दान व्यर्थ छन् मृत्युका पछि
बाल युवा सबै प्रौढ क्रमैले रोग हो गति ।।

।५।
सदावहार यो आत्मा सधैँ एक र सत्य छ
मनले सम्झना राखौँ आत्मा नै सब सत्य छ ।
शरीर नहुँदा मेरो छैनन् गर्ने कुनै पनि
हूँ अमर म यो आत्मा अविनाशी बुझे अनि ।।

छन्द – अनुष्टुप