हामी सबैकाे संसारन्यूज

कलानिधि दाहाल, काठमाडौं

बने ताजा खाजा मनसँग कतै हुन्न झगडा
सधैँ राम्रो सोचे सुमधुर हुने मानिस बडा ।
सबै सीमा छाडी उदयपुरमा उड्न म सके
हुने छैनन् झञ्झा झपट सजिला बिर्सन सके ।१।

लिई लोभी क्रोधी मन हिँडिदिए हुन्छ झगडा
म पाऊँका तृष्णा तरल तममा हुन्छ झगडा ।
छु अग्लोको आँखो अतिशय भए हुन्छ झगडा
सबै कोही केही यति बुझिदिए हुन्न झगडा ।२।

यता बिर्सी आफू सहज गतिमा पाउ छरिए
यिनै सच्चा भाका मनमधुरमा भित्र भरिए ।
सदा मायाका यी तुहिन जुइना चट्ट चुँडिए
कतै हुन्नन् भारी भुवनभरका क्रोध थुनिए ।३।

म को हूँ के हूँको अतल गहिरो चिन्तन उठे
छु जाँने कस्तामा अलिकति यता मन्थन जुटे ।
कहीँ हुन्नन् कोही कलुष दिलले उग्र उभिने
न बाझा हुन्छन् यी न त छ झगडा यो मन छुने ।४।

उकालो आफैँ हूँ टकटक हिँडे चुम्छु शिखर
म ओराली आफैँ फटफट झरे संयम भिर ।
छु तेर्सो आफैँ यो जग छ गतिलो दौड म बडा
भनी गाढा सोचे न त छु म कतै हुन्छु झगडा ।५।

पगालूँ नौनीझैँ नरम कमलो कोमल मुना
मुनाभन्दा राम्रा मृदुल मन गाँसू दिल दुना ।
लिई हत्केलामा हरित प्रणयी पल्लव पला
सफा पारी माँझी नयन म छरूँ व्यापक थला ।६।

पुराना अन्धा यी गणित गुरुका फाल्न म सकूँ
नयाँ आस्था रोपी अविदित यता गाल्न म सकूँ ।
ससाना झुत्रा छन् झपट पटमा दूर म गरूँ
सबै रित्ता पारी दृढ नव कला भित्र म भरूँ ।७।

बिहानीको नौलो सममय छटा छाँट छरिऊँ
सदा उस्तै रम्ने जनमन भरी भाव भरिऊँ ।
तिता लोभी ताना तनन बलले चुँड्न म सकूँ
सधैँ सच्चा नौलो सृजनपथमा गुड्न म सकूँ ।८।

न पानीमा आगो,न छ अनल पानीभर भरूँ
न थोत्रा साना यी जडगफ भरी गायन गरूँ ।
भए मुक्तात्मा यी स्खलित पथका झञ्झट बडा
कहाँ हुन्छन् मान्छे सुझ न बुझ गर्छन् र झगडा ।९।

छन्द : शिखरिणी
गण : य म न स भ ल गु
सङ्केत : lSS – SSS – lll – llS – Sll – l – S
विश्राम : छ,एघार अक्षरमा
अक्षर सङ्ख्या : सत्र हरेक पङ्तिमा