हामी सबैकाे संसारन्यूज

तारा विष्ट छन्दार्पण,दाङ, हाल,मलेसिया

यो देशको छ पहिचान अहा मजाको
जङ्गी निशान गरिमा छ निकै ध्वजाको ।
सम्मान यो मुलुकको अति गर्नु पर्छ
सीता यतै अरनिको अब खोज्नु पर्छ ।।१

नेपालकै जमिनमा सुन फल्न थालोस्
यौटा नवीन युगले फल टिप्न थालोस् ।
सेता हिमाल लहरा अति मुस्कुराऊन्
मुग्लानमा युवक छन् घरदेश आऊन् ।।२

माटो चुमेर म रमूँ अझ पौरखी भै
हुल्दै अनाज म बसूँ घर हिम्मती भै ।
संसार पर्यटक होस् नित घुम्न आओस्
लाली गुराँस वनमा रङ छर्न पाओस् ।।३

झण्डा छ अङ्कित अहा र त सूर्य चन्द्र
नेपाल सुन्दर निकै छ समान स्वर्ग ।
यस्तो धरा भुवनमा छ र ? छैन अर्को ?
नेपालको छ महिमा हिम शैल अग्लो ।।४

हौँ फूल धेर थरका तर एक हामी
जन्ती अनेक सुखका दुखका मलामी ।
हामी सदा मुलुकमा शुभकार्य रोजौँ
आऊ जुटौँ प्रगतिको शुभमार्ग खोजौँ ।।५

छन्द : वसन्ततिलका
गण : त भ ज ज गु गु
गण सङ्केतः ssi  sii  isi  isi ss
यति विश्राम :भरसक आठौँ अक्षरमा
अभ्यास : सस्वर्णपाठशाला