हामी सबैकाे संसारन्यूज

उत्तम विचार,टोखा, काठमाडौं

कहरमै बित्यो लाग्छ जिन्दगी
रहर पक्रिई भाग्छ जिन्दगी ।
सुखविना हुँदा दुःख आर्जन
गरिब ठान्दछन् कष्ट हो धन ।।१।।

बगरमै सडे प्यास जिन्दगी
सरगमा उडे आस जिन्दगी ।
सहिद स्वप्नझैँ भाँचिए कति
गरिब भोग्दछन् मात्र दुर्गति ।।२।

अधरमा फुली हाँस्न पाइयोस्
लहरमा डुली बाँच्न पाइयोस् ।
समयले कतै पर्खिने भए
दिन र रात नै हुन्न निश्चय ।।३।

कमलझैँ फुलोस् बिर्सिई हिलो
तब न जिन्दगी बन्छ चम्किलो ।
असल मार्गमा हिँड्न पाइयोस्
फसल खेतमा टन्न लाइयोस् ।।४।

सडकमै सडे भोकमा कति
सदनमा लडे झोकमा कति ।
मदन च्याप्दछन् साथमा मुना
हृदयमाछ जो हैन पाहुना ।।५।

छन्द : इन्दिरा
गण : न र र ल गु
गण सङ्केत : III – SIS – SIS – I – S