हामी सबैकाे संसारन्यूज

भूपाल अधिकारी, विराटनगर

१.
पगालेपछि शरीरको बोसो थाहा पाउँछौँ
फुटाएपछि जोडिएको चोसो थाहा पाउँछौ
हे घुस्याहा झुस्याहा र पाखण्डी बन्नेहरू हो,
मुहारमा पोतेपछि कालोमोसो थाहा पाउँछौँ।

२.
निजी स्वार्थसिद्ध गर्न जपिरहन्थे मन्त्र कसै कसैले
मलाई कहिले नि हुन् दिँदैन्थे स्वतन्त्र कसै कसैले
मेरै जमिनमा विशाल पापको साम्राज्य खडा गरी,
मेरै चिहान खन्दै गरिरहन्थे षड्यन्त्र कसै कसैले।

३.
सैतानले झैँ सताउँछ मलाई दिमाग खालि छ भन्ने
शकुनीको जस्तो जाल रच्छ यदि ऊ जाली छ भन्ने
मेरो स्वाभिमानले मेरै खुन उमाल्छ अन्याय गरेपछि,
अनि म भुल्न थाल्छु को कति शक्तिशाली छ भन्ने।

४.
पहिचान र अस्तित्व बचाई रहने रिती हुँ म
एकता बन्धुत्व अनि सद्भावको नीति हुँ म
तर अभिमान गर्दै खुब तुजुक देखाउनेलाई,
आकाशबाट भुईँमा पछार्ने परिस्थिति हुँ म।

५.
पण्डितले झैँ वरिपरि रेखीको घेरो बनाई रहन्छन् मान्छेहरू
जाँतो जस्तो घुमि रहुन् भनी फेरो बनाई रहन्छन् मान्छेहरू
यदि निरीह साना र कमजोरहरूले माथि उठ्न खोजेँ भन्ने,
विवशताको भाँडोमा हाली कट्मेरो बनाई रहन्छन् मान्छेहरू।