हामी सबैकाे संसारन्यूज

घनश्याम पौडेल, पोखरा

हिमाल खेल्छ तालमा, पिएर स्वच्छ वायु यो
रहे त सुग्घरी धरा, करोड वर्ष आयु हो ।
हरेक चीज बीजमा, मिलाबटी छ औषधि
किनेर ल्याउँदा यसै, सकिन्न खान राम्ररी ।१।

बिषादि हुन्छ सागमा, झनै बिषाक्त तेलमा
अमूल्य भन्नु जिन्दगी, बहन्छ भेल खेलमा ।
हुँदैन गन्ध पुष्पमा, उभार हुन्छ वाष्पको
भनिन्छ पौष माघमा,भएछ ताप ग्रीष्मको ।२।

अनेक जुक्ति लाउँछन्, प्रयोग गर्नमा धरा
खनिन्छ सर्ब ठाउँमा, सुकेर जान्छ कन्दरा ।
बिकास नाम पार्दछन्, बिनास गर्दछन् अति
स्थलीय जीव जन्तुमा, हुनेछ औधि नै क्षति ।३।

रहेन शुद्ध स्वासमा, न शुद्ध अस्पतालमा
डुलेछ गिद्ध लासमा, यहाँ हरेक सालमा ।
बिशुद्ध काम गर्दछौँ, भनिन्छ यत्रतत्र नै
हरेक साल फेरिने, छ कर्मकाण्ड पत्र झैँ ।४।

बिकासशील राष्ट्रको,उही छ हाल आखिर
दिए त खाउँला भनी, ,कुरेर बस्न माहिर ।
बतास छैन शुद्ध त्यो, मिलेछ धेर कार्वन
लुटेर बन्दछन् धनी, गरेर मात्र आर्जन ।५।

फुटेर हुन्न लौ सबै, जुटेर लाग्नु पर्दछ
’हुदैन भन्नु’’सोच त्यो,अवश्य त्याग्नु पर्दछ ।
उपाय अन्य लाख छन्,बसेर खोज लौ अब
गरेर देखियो भने, हुनेछ राष्ट्र सौरभ ।६।

हुँदैन काममा ढिला, गरिन्छ थालनी भने
हुनेछ काम दूर त्यो,ढिला र सुस्त गर्दिए ।
हरेक गाउँठाउँमा, सचेतना बढाउँदै
लिएर बाल बालिका,जगाउँदै पढाउदैँ ।७।

जुरूक्क उठ्नु हे युवा, बनिन्छ देश स्वर्ग झै
हराभरा बनाउने, बसिन्छ कर्म सम्झदै ।
जुटेर एक आपसी, हिताय हुन्छ सर्बको
बसेर यही भूमिमा, लिईन्छ ताप स्वर्गको ।८।

छन्द : पञ्चचामर
गण : ज – र – ज – र – ज – गु
सङ्केत-ISI – SIS – ISI – SIS – ISI – S