हामी सबैकाे संसारन्यूज

३० चैत, काठमाडौँ । उपप्राध्यापक भुवन न्यौपानेले ‘बिपीका कथाको संकथनको विश्लेषण’ शीर्षकमा त्रिवि, मानविकी तथा सामाजिकशास्त्र डीन कार्यालयबाट विद्यावारिधि प्राप्त गरेका छन् ।

उनका कथामा प्रत्यक्षतः चरित्रको अन्तद्र्वन्द्वग्रस्त अवस्थालाई चित्रण गरिएको पाइए पनि परोक्ष रूपमा सामाजिक, आर्थिक, राजनैतिक नवक्षितिजको वा नवचेतनाको ढोका उघार्ने काम गरिएको र व्यक्ति स्वतन्त्रताका पक्षमा समर्थन जनाइएको न्यौपानेले उल्लेख गरेका छन् । यौन मनोविश्लेषणात्मक कथामा यौनको विषयलाई पनि मर्यादित बनाउन सक्नु कोइरालाको शब्दचयन र प्रयोगको खुबी भएको जनाइएको छ । विषयवस्तुका दृष्टिकोणबाट मात्र नभई शिल्पशैलीगत रणनीतिक पक्षका कोणबाट पनि परम्परागत कथा लेखनको एकरेखीयता तथा घटनाप्रधानतालाई भङ्ग गर्दै चरित्रको प्रधानतालाई कथालेखनको पद्धति बनाइएको न्यौपानेको निष्कर्ष छ ।

गुल्मी हर्दिनेटाबाट कीर्तिपुर आई त्रिवि, त्रिचन्द्र कलेजमा भाषाविज्ञान विषय अध्यापनरत ४२ वर्षीय न्यौपानेका निर्देशकमा प्रा डा व्रतराज आचार्य र सहनिर्देशकमा प्रा डा कृष्णहरि बराल रहेका थिए । सन् १९६६ मा पहिले सङ्कथन विषयमा रुसी र पछि फ्रान्सेलीले अध्ययन गरेका हुन् । उनका भाषाविज्ञानसम्बन्धी दुई पुस्तक र थुप्रै लेखरचना प्रकाशित छन् ।