हामी सबैकाे संसारन्यूज

बस्तीहरू शहर बसाइँ सरे पछि
हिजोआज ..
खेतका सुखा गह्राहरू
आफ्नो बाँझो छातीलाई
तातो आँसुले सिंच्दै
रोप्दैछन रे प्रतिक्षाका बिउँहरू
फेरि पौरखी हातहरू
उम्रिने आशामा ।
बस्तीहरू शहर बसाइँ सरे पछि
हिजोआज..
गाउँका सुनसान गोरेटोहरू
समयले धुमिल पारेका
असंख्य शहरमुखी पाइलाका
डोबहरू नियाल्दै
प्रतिक्षारत छन रे
फर्कि आउछन् फेरि ती पाइलाहरू भन्ने
झिनो आशामा ।
बस्तीहरू शहर बसाइँ सरे पछि
हिजोआज ..
रूँदैछन रे देवी देवरालीहरू
भाकल र फूलपाती बिना
अनि उजाड चौतारीका
रूग्न अवशेषहरू नियाल्दै
उदास छन रे गाँउका
वर पिपलहरू
अहिले यतिबेला
म डाँडामा बसेर मलामी पाउन् छोडेको
खण्डहर गाउँ हेरिरहेछु ।