हामी सबैकाे संसारन्यूज

बन्द गरेपनी चारै दिशाका झ्यालढोका
मसिना छिद्रहरूबाट
जतिखेरै पस्छ धुलो
र टाँसिएर, परत परेर बस्छ
पढ्न राखेका टेबलका किताबभरी

एकैदिन गरूँ अन्देखा
भरिन्छ
र्‍याक,दराज ,खाटभरि
भुइँ र सिंढीभरि

धुलो
मेरो सार्वकालिन ,सबभन्दा बलियो शत्रु हो
र यसलाई थाहा छ मेरा कमजोरी

जत्ती होऊँ चनाखो
भित्रिन्छ आफ्नै ज्यानका लुगा
जुत्ता वा झोलासँगसँगै पनि

वर्षौंदेखी
फ्याँकिरहेछु म धुलो
भुईं र सिंढीहरू बढार्दै
टेबल,खाट र दराजहरू पुछ्दै

तर कुन कुन कमजोर चरहरूबाट छिरेर
पसिरहेको छ धुलो मभित्र?
र गरिरहेको छ
निरन्तर मलाई शासन !
गरिरहेको छ नजानिंदो गरी
मलाई मक्क्याएर मार्ने उद्यम !!

संसार जितेर फर्किंदा पनि
म हार्छु हरेक दिन
आफैंभित्रको धुलोसँग

जुन दिन जित्ने छु यो धुलोसँगको लडाइँ
मैले जित्नुपर्ने कुनै युद्ध
रहने छैन बाँकि ।