Sansar News
४ बैशाख, काठमाण्डौं । बेलायतमा कोरोना संक्रमणपछि उपचार गराइरहेका हरिमान गोम्देनको निधन भएको छ ।
छथरजोरपाटी गाउपालिका १ (साविकको हात्तिखर्क १) माक्लुङ, धनकुटा निवासी हाल लण्डन वेष्टमा रहदै आएका गोम्देन तामाङ्ग (21149767 LCpl) को नोवेल कोरोना भाईरसको कारण उपचारको क्रममा बुधबार (१५ अप्रिलमा) अस्पतालमा निधन भएको हो ।
८२ वर्षीय तामाङ हात्तिखर्कको उपप्रधानपन्च, भारती निम्न माध्यमीक विद्यालय (हाल माध्यमीक) को पटक पटक संचालक समितिको अध्यक्ष समेत भएका थिए । उनी विक्रम सम्बत २०४९-०५० राष्ट्रिय जनमुक्ति पार्टी जिल्ला समिति धनकुटाको कोषाध्यक्ष समेत रहेका थिए ।
बेलायतमा रहेका समाजवादी पार्टी नेपालका प्रवास विशेष प्रदेश समितिका मुख्यसचिव विश्वास दीप तिगेलाले छर छिमेकका काका तथा अत्यन्तै शालिन व्यक्तित्वको मृत्युले अत्यन्तै मर्माहत भएको बताउँदैे दुःख व्यक्त गरेका छन् ।
बुधबारै स्याङ्जाका लक्ष्मण श्रेष्ठ र तनहुँ शुक्लागण्डकीका हस्तवीर गुरुङको पनि कोरोना संक्रमणका कारण मृत्यु भएको छ ।
श्रेष्ठ र गुरुङ र तामाङको मृत्यु भएसँगै बेलायतमा कोरोना संक्रमणका कारण मृत्यु हुने नेपालीको संख्या १४ पुगेको छ ।
बेलायतमा यसअघि कोरोना संक्रमणका कारण लिला बहादुर राई, पर्वतका चेत बहादुर गुरुङ र मेख बहादुर गुरुङ, सोलुखुम्बुका शिव श्रेष्ठ, विराटनगरकी बसन्ती राई, म्याग्दीका कुल बहादुर फगामी, चितवनका प्रशान्त अर्याल, बाग्लुङका कर्ण बहादुर क्षेत्री, स्याङजाका यम बहादुर मल्ल र पोखराकी पुष्पा घले र कास्की घान्द्रुकका लक्षिन गुरुङ सहित १४ जनाको मृत्यु भएको समाचार संसारन्युजले प्राप्त गरेको छ ।
वि.सं.२०७७ वैशाख ४ बिहीवार १६:४२ मा प्रकाशित
