Sansar News
७ बैशाख, बेलायत । बेलायतमा शनिबार र आईतबार (१८ र १९ अप्रिल) दुई नेपालीको मृत्यु भएको छ ।
जसमा कोरोना संक्रमणका कारण साउथ इस्ट लंडनका चार्टड एकाउन्टेन ध्रुव कुमार श्रेष्ठको उपचारका क्रममा मृत्यु भएको हो ।
मृतक श्रेष्ठ पोखरा बगाले टोलका चित्र श्रेष्ठका छोरा रहेको बताइएको छ । उच्च ज्वरो र श्वास प्रस्वासमा समस्या भएपछि १० दिनअघि सेन्ट थोमस अस्पतालमा भर्ना भएका थिए । उनको शनिबार राति निधन भएको अर्का चार्टड एकाउन्टेन एलएन पाण्डेले बताएका छन् । मधुमेहको सामान्य विरामी रहेका श्रेष्ठ लन्डनमा आफ्नै एकाउन्टेन्सी फर्म संचालन गरेर बसेका थिए ।
श्रेष्ठ श्रीमती र तीन छोराछोरीसहित दक्षिणपूर्वी लन्डनको उचिलमा बस्दै आएका थिए । नेपालबाट घुमघामका लागि बेलायत पुगेका उनका बाबु आमापनि बेलायतमै रहेको बताइएको छ ।
त्यस्तै बेलायतमै पूर्व गोर्खा सैनिक म्याग्दीका गंगा बहादुर पुर्जाको पनि उपचारका क्रममा मृत्यु भएको छ ।
आर्मि नम्बर २११४९५०० रहेका पुनको आइतबार (१९ अप्रिल) मा स्वीन्डन स्थिति अस्पतालमा निधन भएको उनका आफन्तले बताएका छन् । तर, उनको मृत्युको कारण भने खुलाइएको छैन ।
हालसम्म बेलायतमा श्रेष्ठसहित कोरोना संक्रमणका कारण ज्यान गुमाउने नेपालीको संख्या १६ पुगेको छ ।
स्मरण रहोस्, बेलायतमा यसअघि कोरोना संक्रमणका कारण लिला बहादुर राई, पर्वतका चेत बहादुर गुरुङ र मेख बहादुर गुरुङ, सोलुखुम्बुका शिव श्रेष्ठ, विराटनगरकी बसन्ती राई, म्याग्दीका कुल बहादुर फगामी, चितवनका प्रशान्त अर्याल, बाग्लुङका कर्ण बहादुर क्षेत्री, स्याङजाका यम बहादुर मल्ल पोखराकी पुष्पा घले, कास्की घान्द्रुकका लक्षिन गुरुङ, स्याङजाका लक्ष्मण श्रेष्ठ, तनहुँ शुक्लागण्डकीका हस्तवीर गुरुङ, धनकुटाका गोम्देन तामाङ, गोरखाका बुद्धबल गुरुङ, र ध्रुव कुमार श्रेष्ठ सहित १६ जनाको मृत्यु भएको समाचार संसारन्युजले प्राप्त गरेको छ ।
वि.सं.२०७७ वैशाख ७ आइतवार २०:२८ मा प्रकाशित
