हामी सबैकाे संसारन्यूज

तिम्रो आडम्बर भित्र
बन्दक राखेर अस्तित्व
उजिन्नेमा राखेर स्वाभिमान

मैले तिम्रो अधिनायक सोचसंग
सम्झौता गरेकै हुँ
छोपेर छियाछिया परेका हृदयका
टुक्राहरु
लुकाएर नयनका कुन्डकुन्डमा आक्रोश
छिपाएर पाखुरीमा तागत
मैले
तिम्रो अधिनायक सोचसंग
सम्झौता गरेकै हुँ

फकृएका फुलका
पत्रपत्र छुट्टाएर
रमाइलो मनाउने
नक्कली माली हौ तिमी

मुस्कुराएका ओठहरु उधारेर
पर्व मनाउने नक्कली पुजारी हौ तिमी
जीवनका रक्तिम रेखाहरुमा
षड्यन्त्रका बम पड्काउने
विध्वंसात्मक पात्र हौ तिमी

तिमीहरूको कालो संस्कार भित्र
मैले आफैलाई आहुती दिएकै हुँ
अनि संझौता गरेकै हुँ
दाइजोमा चित्त नबुझे कै कारण
हजारौं चोटहरु सहिरहेँ
दाइजोमा कमि भएकै कारण
हजारौं अपमान पिइरहेँ
कोसेली कमि भएकै कारण
के पो सहेन र
यो कोमल हृदयले

आज पनि ताजै छन्
तिमीले फिर्ता गराएका कोसेलीका पोकाहरु
तिम्रो फोस्रो संस्कारले मारेका
जिउँदा मनहरु खोज
तिम्रो घमण्डले जलाएका
घायल आत्माहरु खोज
कयौं कोमल हृदयका
मलामी गयौ धेरै पटक

अझ पनि
किन घाम लाग्दैन
तिम्रो अन्धकार मानसपटलमा
अझ पनि किन खुल्दैन हृदय
कहिले सम्म दन्किरहन्छ घमण्डको ज्वाला
कहिलेसम्म चुलिरहन्छ अहमको पहाड

अब त ,,
समयले नै दिने छ दन्ड
परिस्थितिले सिकाउने छ पाठ
तिम्रो
अहम् जल्ने छ
ढल्ने छ अहंकार को पहाड
र
उठ्ने छन्
सुषुप्त मनहरु
अनि बाल्ने छन्
उन्मुक्तिको दियो ।।

रामघाट ,पोखरा