हामी सबैकाे संसारन्यूज

आज मलाई
न कुनै हतारो छ
न चटारो नै ।
न जाँनु छ -कतै टाढा
न लुट्नु छ-दुनियाँ
आखिर -ती लुटाहाहरु
पुगे कहाँ ?
+
आँसुको झरी-हाँसोको छाल
युद्ध र प्रेमका
रोमाञ्चक कथाहरू
जन्म र मृत्युको संयोग
सुखदुःखको अनुभूति
महत्वकांक्षा र सपना
सबैसबै छन् – नजरबन्द
कल्पनाको क्षितिजभित्र ।
*
‘छैन केही बितेको
मरिरहेको छ त
मात्र
जीवनको यौवन ।
चलिरहेको छ त
केवल
अन्तर मनमा -अमूर्त द्वन्द ।’
*
हो !
संसार हल्लाएर
टक्क रोकिएको छ
मेरो जीवनको आँधी ।
*
ढलेको छ उमेर
आफ्नैं काखमा
गन्दै -आँसुका तप्केनीहरु ।
तड्पि रहेछ
गतिशून्य शरीर
आफ्नै बिछ्यौनामा ।
उढी रहेकाछन् त
अनन्त व्योममा:
मात्र
चेतनाका रङ्गिन चराहरु ।