हालसम्म साढे ५१ हजार पिसीआर परीक्षण, ६८२ कोरोना संक्रमित, आइसोलेशनमा ५६७ जना, यस्तो छ अन्य विवरण

१२ जेठ, काठमाण्डौं । नेपालमा सोमबार (१२ जेठसम्म) र्यापिड र पिसीआर प्रविधि दुवैबाट १ लाख ४६ हजार ८३४ वटा कोरोनाको नमुना परीक्षण गरिएको छ । जसमा पछिल्लो २४ घण्टामा ८,०७० वटा नमुना परीक्षण गरिएको स्वास्थ्य तथा जनसंख्या मन्त्रालयले जानकारी दिएको छ ।

मन्त्रालयका अनुसार आजसम्म पिसीआर प्रविधिबाट ५१ हजार ६४२ र आरडिटी प्रविधिबाट ९५ हजार १५२ वटा नमुना परीक्षण गरिएको हो । जसमा पछिल्लो २४ घण्टामा २,९०४ पिसीआ र ५,१६६ र्यापिड परीक्षण गरिएको छ ।

प्रदेश परीक्षण विवरण
त्यसैगरी प्रदेश नं १ मा १०,८२७, प्रदेश नं २ मा ६,४६८, बाग्मती प्रदेशमा २३,३१३ गण्डकी प्रदेशमा ७,७०१ प्रदेश नं ५ मा १६,२१५, कर्णाली प्रदेशमा १०,०५८ र सुदूरपश्चिम प्रदेशमा २०,६१० वटा नमुना आरडिटी प्रविधिबाट परीक्षण गरिएको हो ।

क्वारेन्टाइनमा रहनेको संख्या
हाल सातै प्रदेशमा विभिन्न क्वारेन्टाइनमा ४६ हजार २९ जना रहेका छन् । जसमा प्रदेश नं १ मा १,६७७ प्रदेश नं २ मा ९,०२६ बाग्मती प्रदेशमा ८७६, गण्डकी प्रदेशमा १,६८८, प्रदेश नं ५ मा २०,४६३ , कर्णाली प्रदेशमा ३,९९१ र सुदूरपश्चिम प्रदेशमा ८,३०६ जना रहेको स्वास्थ्य मन्त्रालयले सोमबार (जेठ १२ गते) को नियमित पत्रकार सम्मेलनमा जानकारी दिएको हो ।

आइसोलेसनमा
हालसम्म ७ प्रदेशका ४३ जिल्लाका विभिन्न अस्पतालमा ५६७ जना आइसोलेसनमा रहेका छन् ।
जसमा प्रदेश १ मा ६०, प्रदेश २ मा २०१, बाग्मती प्रदेशमा २६, गण्डकी प्रदेशमा ३, प्रदेश नं ५ मा २५६, कर्णाली प्रदेशमा ११ र सुदूरपश्चिम प्रदेशमा १० जना रहेका छन् । उनीहरुको अवस्था सामान्य रहेको बताइएको छ ।

कुन प्रदेशमा कति संक्रमित ?
स्वास्थ्य मन्त्रालयका अनुसार आजसम्म संक्रमित व्यक्ति भेटिएका मध्ये प्रदेश १ का ७ जिल्लाका ८०, प्रदेश २ का सबै जिल्ला (८) का २३५, बाग्मती प्रदेशका ११ जिल्लाका ३८, गण्डकी प्रदेशका ३ जिल्लाका ५, प्रदेश नं ५ का ७ जिल्लाका २९२, कर्णाली प्रदेशका २ जिल्लाका ११ र सुदूरपश्चिम प्रदेशका ५ जिल्लाका १५ जना रहेका छन् ।

संक्रमणबाट मृतकको संख्या ४ पुग्यो
नेपालमा कोरोना संक्रमणबाट मृत्यु हुनेको संख्या ४ पुगेको छ । नेपालमा जेठ ४ गते मृत्यु भएका ७० वर्षीय पुरुषमा कोरोना संक्रमण भएको पुष्टि भएको छ । उनको संक्रमणबाट मृत्यु भएको पुष्टि स्वास्थ्य मन्त्रालयले जेठ १२ गते गरेको थियो ।

स्वास प्रश्वासमा समस्या भएर गत जेठ २ गते विरगन्जको नेशनल मेडिकल कलेजमा भर्ना भएका उनको आइसीयुमा राखेर उपचार गर्ने क्रममा जेठ ४ गते मृत्यु भएको थियो । उनमा कोरोना संक्रमणको आशंकमा नारायणी अस्पतालमा गरिएको परीक्षणमा संकास्पद देखिएपछि पुनः राष्ट्रिय जनस्वास्थ्य प्रयोगशाला टेकुमा गरिएको परीक्षणमा उनमा कोरोना संक्रमण भएको पुष्टि भएको थियो । हाल उनको सम्पर्कमा रहेका सबैको कन्ट्रयाक ट्रेसिङ गरेर परीक्षणको क्रम चलिरहेको पनि स्वास्थ्य मन्त्रालयले जनाएको छ ।

यसअघि जेठ ७ गते गुल्मी मदानेका ४१ वर्षीय शिक्षकको रुपन्देहीको क्रिमशन अस्पतालमा उपचारका क्रममा मृत्यु भएको हो ।

जेठ ४ गते बाँके नरैनापुरका २५ वर्षीय युवाको क्वारेन्टाइनमै रहेका बेला मृत्यु भएको थियो भने जेठ १ गते सिन्धुपाल्चोककी २९ वर्षीया सुत्केरी महिलाको धुलीखेल अस्पतालमा उपचारको क्रममा मृत्यु भएको थियो ।

उनको कोरोना संक्रमणबाट मृत्यु भएको घोषणा जेठ ३ गते गरिएको थियो । उनी कोरोना संक्रमणबाट नेपालमा मृत्यु हुने पहिलो व्यक्ति हुन् ।

आज थपिएका ७९ संक्रमितसँगै संक्रमितको संख्या ६८२ पुग्यो
नेपालमा आजमात्रै ७९ जना कोरोना संक्रमित भेटिएका छन् । पछिल्लोपटक थप ७ जनामा कोरोना संक्रमण पुष्टि भएको छ ।

स्वास्थ्य मन्त्रालयका अनुसार पछिल्लोपटक पुष्टि भएका ७ जनामा सेती अस्पतालमा गरिएको परीक्षणमा अछाम मेललेकका ३२ वर्षीय पुरुष, भेरी अस्पतालमा गरिएको परिीक्षणमा गुलरिया १० बर्दियाका २२ र २४ वर्षीय पुरुष तथा गुलरिया २ का १८ वर्षीय पुरुषमा कोरोना संक्रमण देखिएको छ ।
त्यसैगरी नारायणी अस्पताल विरगन्जमा गरिएको परीक्षणमा जीरा भवानी गाउँपलिका ४ को क्वारेन्टाइनमा रहेका पर्साका १८ वर्षीय र बाराको कलैयामा कार्यरत काठमाण्डौंका २८ वर्षीय पुरुषमा संक्रमण पुष्टि भएको हो ।

त्यस्तै जेठ ४ गते नेशनल मेडिकल कलेज विरगन्जमा मृत्यु भएका ७० वर्षीय पुरुषमा पनि कोरोना संक्रमण भएको पुष्टि भएको स्वास्थ्य तथा जनसंख्या मन्त्रालयले जानकारी दिएको छ । यो सँगै नेपालमा कूल संक्रमितको संख्या ६८२ पुगेको हो ।

चौबिस घण्टामा २४ जना कोरोना संक्रमणबाट मुक्त, निको हुनेको संख्या १११ पुग्यो

निको हुनेको संख्या ११२ पुग्यो

नेपालमा पछिल्लो २४ घण्टामा २५ जना डिस्चार्ज भएका छन् । जसमा १० महिला र १५ जना पुरुष रहेका छन् ।
पछिल्लोपटक डिस्र्चाज हुनेमा पाटन अस्पतालमा उपचाररत काठमाण्डौं, धादिङ, दाङ, धनुषा र बर्दियाका १/१ जना डिस्चार्ज भएका हुन् । उनीहरु ९ देखि १० दिनसम्मको उपचारपछि संक्रमणबाट मुक्त भएका हुन् ।

त्यसैगरी टेकु अस्पतालमा उपचाररत सर्लाहीका ३४ वर्षीय पुरुष पनि संक्रमणबाट मुक्त भएको स्वास्थ्य तथा जनसंख्या मन्त्रालयले जानकारी दिएको छ । उनी अस्पताल भर्ना भएको पाँचै दिनमा डिस्चार्ज भएका हुन् । साथै कपिलवस्तुको तौलिहवाकी एक स्वास्थ्यकर्मी पनि कोरोना संक्रमणबाट मुक्त भएकी छन् ।

त्यस्तै आइतबार बेलुका नारायणी अस्पताल विरगन्जबाट एकै परिवारका १८ जना निको भएका छन् । उनीहरु पर्सा छपकैयाका एकै परिवारका ४ महिनाका बालकदेखि ६६ वर्षसम्मका रहेका छन् । उनीहरु २१ दिनको उपचारपछि घर फर्किएका हुन् ।

हालसम्म डिस्चार्ज हुनेमा प्रदेश १ मा २६, प्रदेश २ मा ३३, बाग्मती प्रदेशमा ११, गण्डकी प्रदेशमा २, प्रदेश ५ मा ३४ र सूदूरपश्चिम प्रदेशमा ५ जना निको भएका हुन् । हालसम्म नेपालमा कोरोना संक्रमणबाट मुक्त हुनेको संख्या ११२ पुगेको छ ।

टिचिङ अस्पतालमा पनि कोरोना परीक्षण सुरु
काठमाण्डौंको महाराजगन्जस्थित टिचिङ अस्पतालमा पनि आइतबारदेखि कोरोना भाइरसको नमुना परीक्षण गर्न सुरु गरिएको छ । यो सँगै देशैभरी २० वटा प्रयोगशालाबाट पिसीआर परीक्षण गरिन्छ ।