हामी सबैकाे संसारन्यूज

४ असार, काठमाडौँ । नेपाली कांग्रेसको प्रवासस्थित भातृ संगठन नेपाली जनसम्पर्क समितिले नेपाली महावाणिज्य दूतावास, न्यूयोर्कमार्फत प्रधानमन्त्री केपी शर्मा ओलिलाई एक ज्ञापनपत्र बुझाएको छ ।

नेपाली काँग्रेसको जेठ २६ गतेको बैठकले गरेको निर्णय र निर्देशन अनुसार ज्ञापनपत्र बुझाइएको बताइएको छ । कोरोना महामारी विरुद्धको कार्यमा सरकारको अर्कमण्यता, भ्रष्टाचार र गैह्र जिम्मेवार प्रवृत्तिका विरुद्ध सबै जनसम्पर्क समितिमार्फत यसरी ज्ञापनपत्र बुझाउने निर्णय गरेको थियो ।

ज्ञापनपत्रमा कोरोना भाइरस(कोभिड–१९) महामारीविरुद्ध सरकारले प्रभावकारी काम नगरेको, कांग्रेसले सुरुवातका दिनदेखि नै कोरोना नियन्त्रणका लागि सरकारले तत्काल गर्नुपर्ने कार्यहरुका बारे कार्ययोजना तय गर्न दिएको सुझाव कार्यान्वयन नगरेको, विज्ञहरुको सुझावलाई समेत बेवास्ता गरेको जस्ता विषयहरु समेटिएका छन् ।

ज्ञापनपत्र बुझाउन सभापति आनन्द विष्टसँगै समितिका महासचिव मुनिन्द्र नेम्वाङ्ग, सचिव भोजराज थोकर, केन्द्रीय सदस्यद्वय बेदप्रसाद खरेल र सुवास लामा, समितिका केन्द्रीय सल्लाहकार कृष्ण बिष्ट, समितिका लंग आइल्याण्ड च्याप्टरका सभापति विश्वराज बाँस्तोलासहित जनसम्पर्क समितिका सदस्यहरु अन्जन चौलागाईं र कला खरेल महावाणिज्यदूतावासको कार्यालय पुगेका थिए ।

बुधबार मात्र काँग्रेसले प्रतिनिधिसभा बैठकमा कोरोनाभाइरस (कोभिड –१९) को रोकथाम तथा नियन्त्रणसम्बन्धमा ध्यानाकर्षण प्रस्ताव दर्ता गराएको छ ।