हामी सबैकाे संसारन्यूज

म दाउरा
इज्जत ढाक्ने तिम्रो आँगनको बार बनूँ
तिम्रा बूढा बा-आमाको टेक्ने लौरो बनूँ
धुरीखाँबो बनूँ र थामूँ कुल !
खरिपाटी बनूँ
जहाँ तिमी लेख्नू जीवनका सुमधुर गीतहरू
आँखीझ्याल बनूँ
जहाँ तिमी आड लिनू र हेर्नू दुनियाँ !

म दाउरा
फ्रेम बनूँ
र, सजाउँदै तिमीलाई आफूभित्र
तिम्रै मझेरीमा अपलोड गरूँ
जहाँ प्रेमका वर्षातहरूले लभ रियाक्ट गर्न सकून् !
एक बलवान् थाँक्रो बनूँ
जहाँ तिमी झाँगिनू
फलाउनू कुनै हाँगामा अहिलेसम्म फल्न नसकेको फल !

म दाउरा
झुक्किएर पनि बनाउन नखोज्नू बिँड
जहाँ मैले नाङ्गो तरबार नाच्नुपरोस्
र, तास्नुपरोस् तिम्रै सभ्यता
बनाउन नखोज्नू दराज
जहाँ लुकाउनुपरोस् रहरहरू
र, ढुसी लाग्नुपरोस्
नघँचेट्नू आगामा
बनाउन नखोज्नू समिधा
जुन दिन लम्बाइ मेटिँदै खरानी हुनेछु
धमिलिनेछ तिम्रै आकाश
बरु बनाउनू मलाई बेलना
जसले बेलेपछि आफैंलाई
मगमगाउन सकूँ मानव-सभ्यता !