हामी सबैकाे संसारन्यूज

काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङको पक्षमा सामाजिक सञ्जालमा अभियान नै चल्न थालेको छ । सामाजिक सञ्जाल प्रयोगकर्ताले घिसिङलाई पुनः कार्यकारी प्रमुखमै ल्याउनुपर्ने भन्दै अभियान चलाउन थालेका हुन् ।

सामाजिक सञ्जालमार्फत चर्चित कलाकारदेखि राजनीतिककर्मीले कुलमानको पक्षमा आफ्नो धारणा राखेका छन् । लोडसेडिङ्ग मुक्त गराएका कुलमानलाई पुनः विद्युत प्राधिकरणको नेतृत्वमा ल्याउनुपर्ने उनीहरुको माग छ । कुलमानको पक्ष सबैभन्दा बढि कलाकारहरुले अभियान चलाईरहेका छन् ।

चर्चित कलाकार मनोज गजुरेलले बहुमतको सरकारलाई कुन चिजले रोक्छ भन्दै कुलमानलाई पुनः सदर गराउन आग्रह गरेका छन् । ‘‘बहुमत जनता’ कुलमानलाई दोहोर्याउनु पर्छ भन्दैछन् भने ‘बहुमतको सरकार’लाई यसो गर्न कुन मतले छेक्छ ? ‘ओके छ त’ भनेर समयको माग र जनताको चाहानाको कदर गरे भैगो, श्री कुलमानलाई नै सदर गरे भैगो’ उनले भनेका छन् ।

गजुरेलले जस्तै गायक शिव परियारले पनि कुलमानलाई पुनः प्राधिकरणको नेतृत्वमा ल्याउन माग गरेका छन् । देशलाई सधैंभरि उज्यालो चाहिएको छ भन्दै उनले भनेका छन्, ‘म ब्यक्तिगत रुपमा कुलमान घिसिङ्ग ज्यु फेरि पुनस् एक पटक बिधुत प्राधिकरणको हाकिम हुनु पर्दछ भनेर नेपाल सरकारसंग एउटा नेपालि नागरिकको हैसियतमा जोड्दार माग गर्दछु !अहिले देशलाई,अहिले मात्र हैन सधैंभरि देशलाई उज्यालो चाहिएको छ ! अब नेपाल सरकारको निर्णय कुरेको छु हेरौं ! आशा छ उज्यालो प्रेमि हामि जस्ता तमाम नेपालि जनताको भावनाको नेपाल सरकारले सम्मान गर्नेछ !’

गायक परियारजस्तै कलाकारहरु हरिवंश आचार्य, करिष्मा मानन्धर, अभय सुब्बालगायतले पनि कुलमानको पक्षमा अभियान चलाएका छन् । लेखक बुद्धिसागरले पनि ‘चाहिने कुलमान नै हो’ भन्दै कुलमानलाई पुनः ल्याउन माग राखेका छन् । कालाकारिता क्षेत्रका सेलब्रटीसँगै राजनीतिक क्षेत्रका नेतृत्वकर्ता पनि कुलमानको पक्षमा देखिएका छन् ।

सत्तारुढ नेकपाका युवा नेता विष्णु रिजालले पनि घाटाको प्राधिकरणलाई नाफामा लैजानु चानुचुने होइन भन्दै कुलमानको प्रशंसा गरेका छन् । उनले भनेका छन्, ‘आफूले पाएको जिम्मेवारी पूरा गर्दा पनि मानिसहरुले माया गर्दछन् भन्ने उदाहरण कुलमान घिसिङ हुन् । उत्पात्तै गरे जस्तो लाग्दैन– विजुली भारतबाट ल्याइएको छ । तर, देशभित्र जे जति व्यवस्थापन गरेका छन्, उदाहरणीय छ । घाटाको ब्यापार गरिरहेको विद्युत् प्राधिकरणलाई नाफामा लैजानु चानचुने होइन।’

आफूले पाएको जिम्मेवारी पूरा गर्दा पनि मानिसहरुले माया गर्दछन् भन्ने उदाहरण कुलमान घिसिङ हुन् । उत्पात्तै गरे जस्तो लाग्दैन– विजुली भारतबाट ल्याइएको छ । तर, देशभित्र जे जति व्यवस्थापन गरेका छन्, उदाहरणीय छ । घाटाको ब्यापार गरिरहेको विद्युत् प्राधिकरणलाई नाफामा लैजानु चानचुने होइन।

— Bishnu Rijal (@bishnurijal1) August 24, 2020

नेपाल विद्युत प्राधिकरणको कार्यकारी निर्देशक कुलमान घिसिङको यहि भदौ २९ देखि कार्यकाल सकिँदैछ । दैनिक १८ घण्टासम्म हुने लोडेसडिङलाई कुलमान घिसिङले अन्त्य गरेका थिए ।

लोडसेडिङ अन्त्य गरेर सबैको मन जितेका कुलमानप्रति आम जनताको सहानुभूति छ । कार्यकाल सकिए पनि फेरि पनि उनैलाई नेतृत्वमा ल्याउनुपर्ने धेरैको धारणा छ ।