हामी सबैकाे संसारन्यूज

तिमी सुवास स्वच्छ हौ सुपुष्प मन्जरी तिमी ।
तिमी प्रकाश पुञ्ज हौ सुरम्य माधुरी तिमी ।।
तिमी प्रभात लालिमा र साँझ गोधुली तिमी ।
तिमी सुसौम्य रात हौ सुपात्र चाँदनी तिमी ।।१।।

तिमी सु-राग बाँसुरी मृदङ्ग ताल हौ तिमी ।
तिमी सु-वाद्य तान्पुरा मिठो सितार हौ तिमी ।।
तिमी सुगन्ध कस्तुरी सुप्रेमकी घटा तिमी ।
तिमी पराग पुष्पकी वसन्तकी छटा तिमी ।।२।।

तिमी बतास गृष्मकी अतृप्त प्यास हौ तिमी ।
तिमी गुलाव कोपिला सदृष्य आश हौ तिमी ।।
तिमी अदृष्य चाहना सचित्र कल्पना तिमी ।
तिमी अमोघ सिर्जना पवित्र भावना तिमी ।।३।।

तिमी सुशोभ्य रत्न हौ सुवर्ण मालिका तिमी ।
तिमी समुन्द्रकी मुगा प्रदीप्त मल्लिका तिमी ।।
तिमी हिमालकी नदी पहाड कन्दरा तिमी ।
तिमी मधेश फाँट हौ सुपुज्य मन्दिरा तिमी ।।४।।

तिमी हरेक शव्दमा सुयोग्य अर्थमा तिमी ।
तिमी अनेक श्लोकमा विभिन्न सर्गमा तिमी ।।
तिमी महान काव्यमा सुवाच्य छन्दमा तिमी ।
तिमी हरेक लेखमा कथा निवन्धमा तिमी ।।५।।

तिमी बगान बाग हौ र खेतका गरा तिमी ।
तिमी सजीव मातृका पियूषकी घडा तिमी ।।
तिमी सुपुज्य जानकी सुसौम्य राधिका तिमी ।
तिमी उमा सरस्वती अदम्य साधिका तिमी ।।६।।

छन्द-पञ्च चामर