हामी सबैकाे संसारन्यूज

हो आयो अनुरोध फेसबुकमा नौली परी दामिनी
हेर्दा विम्व भएँ भुतुक्क मनमा राम्री धनी कामिनी
केको साइत हेर्नु फुर्र मन भो दोस्ती भयो बात भो
लामो च्याट भयो विशेष हुन गो वार्ता मिठो रात भो
टाढाकी सजनी र एकल उनी तेत्तीस जम्मा चढ़ी
प्यारो बैंस अयुग्म जीवन भयो मर्का जवानी अडी
खोजी एक विकल्प भो रहर भो गाह्रो तगारो बढी
मान्छे हार्दिक प्रीत गीत मनको खोजी गरेकी छडी
पीड़ा त्यो मनको बुझेर कविता लेखेर यो पोस्ट भो
आयो एक कमेन्ट आज उनको योगी घना दोस्त भो
लेखी गीत अनेक प्रीत लयमा गाएँ उनी गायिका
दोहोरी गुलियो अचम्म चुलियो मायाँ परी नायिका
मर्यादा परिवार नाम गरिमा सम्झी विवेकी बनें
आए धेर परी गए मन हरी सारा कहानी भनें
आगो हो घर खान्छ जल्छ यसमा घर्की र अर्की गरे
यो हो रोग अनन्तकाल विरही गाह्रो हुने हो भरे
मेरो चाल बुझी परी कहरमा बोली हरायो गइन्
वार्ता च्याट गयो चरी वन उडी प्यारी विरानो भइन्
लीला यो युगको अनेक घरको जोगी सदा जोगियो
छोटो जीवनमा विचित्र रमिता के–के भयो भोगियो !