हामी सबैकाे संसारन्यूज

१.
सार्वजनिक ठाउँमा भने, विकासे गफ हाँक्छौ तिमी
व्यक्तिगत भेटमा भने, तरूनी गफ छाँट्छौ तिमी
दिनभरी त ऋषीमुनी, साँझ परेसी शिशीमुनी
आदर्शलाई थन्क्याएर, ‘खान’ पाए बाँच्छौ तिमी ।

२.
मुखले भने गाइरहन्छौ, आदर्शका गाथाहरू !
कामले भने सक्ने हैनौ, मार्न पनि माखाहरू !!
नभनेको मात्रै पो त, नचिनेको कहाँ हो त !
नजिकमा पो थाहा हुन्छ, बेइमानीका कथाहरू !!

३.
जिन्दगीका खुशीहरू, तिमीले नै लुटी गयौ
रहलपहल खुशीका नि, मूलहरू भुटी गयौ
र पनि म बाँचेकै छु, तिम्रो सामु हाँसेकै छु !
मेरो खुशी नपचेर, अझै मैबाट छुटी गयौ !!

४.
बोल्छौ अझै मीठा मुखले, पेटमै हरि हैनछ र !
भन्थ्यौ जुग्जुग तिम्रै भनी, पहिल्यै निधो रैनछ र !
छुट्टिएर जिउँदा पनि, आँसु मात्रै पिउँदा पनि
सधैभरी सताइरन्छौ, ‘मनको कालै’ गैनछ र ।

५.
मनमा सधै उमंगले, बास नौलो गरिरहोस्
आँखामा पनि सौन्दर्यले, दृष्टि नौलो छरिरहोस्
ईश्वरलाई दायाँ पारूँ !, प्रगतिपथ खुला गरूँ
हातमा अझ सिर्जनाले, सीप नौलो भरिरहोस ।