Sansar News
८ चैत, भारत । भारत पुगेको १० दिनमै एक नेपालीको मोटरसाइकलको ठक्करबाट मृत्यु भएको छ ।
अर्घाखाँचीको पाणिनी गाउँपालिका वडा नं ९ घर भइ भारतको हरियाणास्थित चन्दन नगरमा छोरासँग बस्दै आएका ४२ वर्षीय मान बहादुर कुमालको मोटरसाइकलको ठक्करबाट मृत्यु भएको हो ।
१० दिन अगाडि मात्र हिसार पुगेका कुमाल छोरा गोबिन्द कुमालसँग बस्दै आएका थिए । त्यत्तिकै बसेर समय बिताउनु भन्दा पार्टीमा खाना बनाउने काममा लागेका थिए । मार्च २० का दिन काम सकेर घर आउने क्रममा पछाडिबाट आइरहेको मोटरसाइकलले ठक्कर दिएपछि गम्भीर चोट लागेका उनलाई तत्कालै अस्पताल पुर्याएपनि चिकित्सकहरुले मृत घोषणा गरेका थिए ।
मुल प्रवाह अखिल भारत एकता समाज सुदुरपश्चिमोत्तर क्षेत्रिय समितिका कार्यकर्ता तथा नगर समिति हिसारका कार्यकर्ताको उपस्थितिमा उनको दाहसंस्कार गरिएको नगर समिति हिसारका सचिव तारा सोमरेले संसारन्युजलाई बताएका छन् ।
वि.सं.२०७७ चैत ८ आइतवार १९:१५ मा प्रकाशित
