हामी सबैकाे संसारन्यूज

बिष्णु ठकुरी
साई नन्दन, दिलाराम, दार्जिलिङ

मलाई बुझ्ने कोशिश नगरे हुन्छ
म त बादलको एकटुक्रा हुँ
कहिले आकाशमा उडिहिँड्ने
कहिले पानी भएर बर्षने ।
रुखो धर्तीमा हरियाली भर्ने
म त बादलको एकटुक्रा हुँ ।

मलाई नबुझे हुन्छ
म त एउटा चट्टान हुँ
कहिले दवाल बनेर खडा हुन्छु
कहिले टुक्रा टुक्रा भएर
घरको घडेरी बन्छु ।

हो मलाई नबुझे हुन्छ
कहिले म हावा हुँडरी भई
ब्रमाण्ड नै तहसनहस गर्छु
कहिले थुप्रिएका मैलो कुचिलो
बडारे प्रकृती नै सुकिलो पार्छु ।
हो! म प्रकृती नै सुकिलो पार्छु ।
मलाई बुझ्ने कोशिश नगरे हुन्छ ।

म खोला नालाको पानी
आफ्नै सुरमा सलल बग्ने गर्छु
छेक्तिन कसैको बाटो
कुलो काटेर बरू
मोड्न खोज्छन् मलाई
खुशी खुशी खेतबारी भिजाइदिन्छु म ।
तिर्खाएको बेला तिर्खा मेटाइदिने म नै हुन्छु ।

मलाई नबुझे हुन्छ
म शितल बतास हुँ
गर्मीमा शितल दिन्छु अनि
स्वास–प्रस्वासको मुख्य भूमिका
मेरै हुन्छ बुझिराख्नु ।

म धर्ती हुँ पृथ्वी थाम्ने
लाखौं करोडौंको बोझ थाम्ने
तिम्रो जिन्दगीको आश्था हुँ म
अन्नबाली र मनुष्यको खेत खलियान
अदम्य शक्तिको रुप हुँ म
माया र ममताको धरा हुँ म ।

किन बुझ्ने मलाई
आफैलाई बुझ्ने कोशिश गर
मलाई नबुझे हुन्छ ।
आफ्नो धर्म निभाउन सक्छु म ।