हामी सबैकाे संसारन्यूज

बगदाद, इराक । शिया नेता मुक्तादा अल–सदरका समर्थकहरूसहित सयौं इराकी प्रदर्शनकारीहरूले शनिबार पनि संसद परिसरमा प्रवेश गरी प्रदर्शन गरेका छन् । प्रदर्शनकारीद्वारा ७२ घण्टा दोस्रो पटक संसदभित्र प्रवेश गरी प्रतिद्वन्द्वी इरान निकट दलहरूले प्रधानमन्त्री पदको मनोनयन गरेपछि विरोधमा दोस्रो पटक बगदादस्थित संसद भवनमा आक्रमण गरेका हुन् ।

अल–सदरका समर्थक तथा अन्य प्रदर्शनकारीहरूले ठूलो सङ्ख्यामा तैनाद सुरक्षाकर्मीको घेरा तोडी संसद परिसरमा पसेका थिए । उनीहरूले इराकी झन्डा र प्लेकार्डसहित संसद परिसरमा नाराबाजी गरेपछि केही संसदभित्र पसेका थिए । यद्यपि, उक्त समयमा संसद भवनमा कुनै विधायक भने थिएनन् ।

हजारौं प्रदर्शनकारीहरू संसद भवनबाहिर भेला भई भित्र पसेका प्रदर्शनकारीलाई सुरक्षा प्रदान गरेका थिए । गत अक्टोबरमा भएको आम निर्वाचनमा सदरको पार्टीले सबैभन्दा धेरै सिट जिते पनि सरकार बनाउन सकेको छैन । संसद् भवन प्रवेश गरेका प्रदर्शनकारीहरूलाई प्रहरीले अश्रुग्यास र पानीको फोहरा प्रयोग गरेर रोक्ने प्रयास गरे पनि अन्ततः उनीहरू संसद भवनभित्र छिर्न सफल भएका थिए ।

प्रदर्शनकारीहरूको ठूलो भीड सुरक्षाकर्मीहरूको बाक्लो उपस्थिति रहने ग्रिन जोनमा रहेको संसद भवनमा प्रवेश गरेको थियो । यो क्षेत्रमा विभिन्न देशका दूतावासहरू सहित राजधानी स्थित सबैभन्दा महत्वपूर्ण भवनहरू छन् । नौ महिना लामो गतिरोधपछि इरानमा अशान्ति सुरु भएको हो । त्यहाँ देशका विभिन्न राजनीतिक समूहहरूबीचको विवादका कारण निर्वाचनपछि नयाँ सरकार गठन हुन सकेको छैन ।

इराकमा अमेरिकी हस्तक्षेपको विरोध गर्दै आएका शिया धर्मगुरु सदरको दलले अक्टोबरको निर्वाचनमा जीत दाबी गरेको थियो । तर, आफ्ना प्रतिद्वन्द्वीसँग सहकार्य गर्न सदर तयार नभएपछि उनको दलले सरकार निर्माणका लागि गठबन्धन बनाउन सकेको छैन । (रासस/एएनआई)