Sansar News
सुरेशकुमार पान्डे,दाङ
दूध शुद्ध चाहिन्छ गाई भैंशी पाल्दैनन् कसैले,
शुन्दर सफा घर चाह्यो फोहोर फाल्दैनन् कसैले ।
भन्छन सबैले महंगी र भ्रष्टचार बढ्यो देश भित्र,
तर देशमा सुब्यबस्थाकै कदम चाल्दैनन् कसैले ।
कस्ता दिन आए र सोंच पलायो मानिसहरूको,
अंध्यारो छ भन्छन एउटा दियो बाल्दैनन् कसैले ।
घर घरमै छन पार्टी बनेकाछन नेता आआफैमा,
सबै सुखभोगी दुःखको बाटो अगाल्दैनन् कसैले ।
गरिबको राज आएन भनी फुटेकाछन आपसमा,
तर पनि सच्चा बर्गशंघर्ष कत्ती थाल्दैनन् कसैले ।
धेरै जसो बिकाउ भए पेसाको लागि बने पेसेवर,
इमान्दार हराउँदै गए नेतृत्वनै समाल्दैनन् कसैले ।
वि.सं.२०७९ भदौ १८ शनिवार ०८:५७ मा प्रकाशित
