हामी सबैकाे संसारन्यूज

ओम आचार्य, अर्घाखाँची

तिनीहरू एक्कासी आए
मलाई मन परेन
मैले हेरिरहेको हुन्छु
तैपनि कहिलेकाँही झुक्काइहाल्छन्
आफ्नो चरनमा
अरुका बस्तुभाउ पसेको को मन पराउँछ र ?

कसैको सन्धिसर्पनमा
अनुमति बिनै छिरेर
बारीभरिको चास खाइदिएको हेरेर को बस्न सक्छ ?
असम्भव÷असह्य
धपाउनै पर्छ जसरी पनि ।

सतर्कता साथ
बनेको छ नयाँ योजना
टसमस नगरी अगाडि बढ्ने हो
तारबारको स्थायी व्यवस्था हुँदैछ
गोप्य रूपमा सबैको आङमा घाम लाग्ने गरी ।

हतार हतारमा
चोटाकोठा चहार्न पर्यो
अलिक हप्काइ दप्काइ
अलिक ललाइ फकाइ
लावण्य देशमा नवराज खोज्ने काम फत्ते भएको छ
अमूक साइतमा राज तिलक दिने हो ।

उत्तरतिर कसैले भनेका थिए रे
‘बिरालोको काम मुसा मार्ने हो’
रङ्ग कालो भए पनि सेतो भए पनि फरक पर्दैन
यो नयाँ जमाना हो
ब्यापार नगरी को बस्न सक्छ र ?