हामी सबैकाे संसारन्यूज

काठमाडौं । बैंक तथा वित्तीय संस्थाहरुको ब्याजदर घटेसँगै सेयर बजारमा उत्साह आउने अपेक्षा गरिएको थियो । तर, त्यसको विपरित सेयर बजार ओरालोमा मात्रै छैन कारोबार रकम पनि घटिरहेको छ ।

बैंक तथा वित्तीय संस्थाहरुले ब्याजदर घटाउने निर्णय गरेका दिन एकै दिन ९२.२२ अंकले बढेको बजार त्यसयता भने निरन्तर ओरालोमा छ ।

चैत ३० मा २९.०८ अंकले घट्दै १९३४.४८ मा झरेको बजार नयाँ वर्षको पहिलो कारोबार दिन वैशाख ३ मा थप २.७९ अंकले घट्दै १९३१.६८ अंकमा अडियो ।

त्यसयता वैशाख ४ मा (सोमबार) २३.६३ अंकले घट्यो भने आज (मंगलबार) थप ३.०७ अंकले बजार घटेको छ । बजार १९०४.९९ को बिन्दुमा झरेको छ ।

बजार निरन्तर ओरालोमा मात्रै छैन कारोबार रकम पनि निरन्तर घटिरहेको छ । चैत अन्तिम साता कारोबार रकमसँगै बढेको नेप्सेमा त्यसयता एक अर्ब बराबरको पनि कारोबार छैन ।

यो साता आइतबार ९६ करोड ३९ लाखको कारोबार भएको थियो भने सोमबार ८९ करोड ६८ लाखको कारोबार भयो । यसैगरी, मंगलबार थप कारोबार रकम घटेको छ । मंगलबार कारोबार रकम ७९ करोड ८९ लाख छ ।

कारोबार रकम घट्नुलाई सेयर बजारप्रति विकर्षण हुँदै गरेको रुपमा पनि बुझिन्छ । सामान्यतयाः एक अर्बसम्मको कारोबार नभएको अवस्थालाई हेर्दा, सेयर बजारप्रति लगानीकर्ता उत्साहित देखिन्नन् ।