हामी सबैकाे संसारन्यूज

भूपाल अधिकारी, बिराटनगर

१.
बिहान फुल्ने साँझ ओइली झर्ने फूल भयो जिन्दगी
वल्लो घाट न पल्लो तिर झैँ ढुलमुल भयो जिन्दगी
किन जहिले पनि अरु कै इशारामा यसरी चल्नुपर्ने
कहिले झ्याल कहिले ढोकाको चुकुल भयो जिन्दगी

२.
जस्तो रोप्नु हुन्छ त्यस्तै नै उपज हुन्छ बुझ्नुस्
सत्य अँगाल्नुस् अनि जीवन सहज हुन्छ बुझ्नुस्
सदा के ठीक के बेठीक भनेर अल्मलिनेहरू हो
प्रेम र युद्धमा सबैथोक जायज हुन्छ बुझ्नुस्

३.
पैसाले मात्र चल्ने अदालत नहोस् भन्छन् गरीबहरु
जिन्दगी सामन्ती कै अमानत नहोस् भन्छन् गरीबहरु
सधैं भोक रोग र चोटले थिलथिलो भएर बाँच्नु कति
अझैं जिउँदै हाम्रो सनाखत नहोस् भन्छन् गरीबहरु

४.
अहंकारको प्रर्दशन गर्ने ब्रजस्वाँठलाई जांबाज भन्नु पर्ने भो
लक्ष्य नभएका नेतालाई पाइलट बिहिन जहाज भन्नु पर्ने भो
को छन् र यहाँ आफूलाई सानो हुँ भन्नेहरु देखेका छौं अहिले
कस्तो समय कुखुरा चोरलाई पनि अचेल महाराज भन्नु पर्ने भो

५.
युद्ध पनि कसैका लागि यौटा हज हुन्छ बुझ्नुस्
घाट जाने बेलामा चिता नि सजधज हुन्छ बुझ्नुस्
कुन धर्म र के का लागि यो खुनको होली खेल्छौं
मरेपछि मिल्ने जमीन सिर्फ दुई गज हुन्छ बुझ्नुस्