हामी सबैकाे संसारन्यूज

कल्पना भट्टराई, काठमाडौं

कता जाने होला अलमल परेको छु पथमा
कठै ! चढ्नै गाह्रो अति समयको दिव्य रथमा
कुनै होलान् मेरा पनि नजिकका सारथि भनी
कडा पीडा भोगेँ नियति गतिको बन्धन पनि ।१।

कथाले मागेको छ अब कविता लेख्छु सरर
कहानी छन् मेरा अति जहरिला कष्ट कहर
कसैले बुझ्दैनन् विकल मनका रोदन पनि
कडा पीडा भोगेँ नियति गतिको बन्धन पनि ।२।

कुनै गर्छन् निन्दा किन दिनदिनै घुम्छ मगज
कुनै घस्छन् चिप्लो हरबखत नै बन्छु सजग
कुनै देखा पर्छन् अति सुलसुले घातक बनी
कडा पीडा भोगेँ नियति गतिको बन्धन पनि ।३।

कुनै आँखा तर्छन् कुटिल मनले निल्न जसरी
कुनै बन्छन् काँडा प्रगति पथमा बढ्नु कसरी
कुनै देख्दा लाग्छन् असल मतिका सुन्दर धनी
कडा पीडा भोगेँ नियति गतिको बन्धन पनि ।४।

कसैका आँखाको अति अगतिलो झार नबनूँ
कुनै दुःखीलाई मलम अथवा साथ म बनूँ
कसैको सेवामा हरपल खटूँ सेवक बनी
कडा पीडा भोगेँ नियति गतिको बन्धन पनि ।५।

छन्द : शिखरिणी
गण : य म न स भ ल गु
सङ्केत : lSS  SSS  lll  llS  Sll  l  S