हामी सबैकाे संसारन्यूज

नयाँदिल्ली । दिल्लीको रोहिणी क्षेत्रमा सञ्चालित आशा किरण सेल्टर होममा जुलाई महिनामा सबैभन्दा धेरै मृत्यु रेकर्ड गरिएको छ ।

आधिकारिक प्रतिवेदनअनुसार सन् २०२४ को फेब्रुअरीदेखि मृत्यु भएका कूल २५ मध्ये १४ (पुरुष–छ, महिला–आठ) जनाको मृत्यु सेल्टर होममा जुलाई महिनामा मात्र भएको छ । आशा किरण शेल्टर होमले दिल्ली सरकारलाई दिएको प्रतिवेदनमा पखाला, हल्का ज्वरो, बान्ता र बेहोसीका कारण मृत्यु भएको बताएको छ ।

“दिल्लीमा आशा किरण सेल्टर होम सञ्चालन भइरहेको छ । यहाँ बसोबास गर्नेहरू प्रहरीले उद्धार गरेका बेवारिस मानिस हुन् । जुलाईमा यहाँ एक शिशुसहित १४ जनाको मृत्यु भएको रिपोर्ट आएको छ ।

यसबारे छानबिन गरी २४ घण्टाभित्र प्रारम्भिक प्रतिवेदन पेश गर्न निर्देशन दिइएको छ”, उक्त घटनामा प्रतिक्रिया दिँदै दिल्लीका मन्त्री आतिशीले भने, “हामी शव परीक्षणको प्रतिवेदन पर्खिरहेका छौँ, म दिल्लीका जनतालाई आश्वासन दिन्छु कि कुनै लापरवाहीका कारण मृत्यु भएको प्रतिवेदन आयो भने संलग्न व्यक्तिलाई कारवाही गर्नेछौँ ।”

दिल्लीका उपराज्यपाल भि के सक्सेनाले आशा किरण सेल्टरमा भएका मृत्युसहित जिएनसिटिडीद्वारा सञ्चालित सबै सेल्टर होमहरूको अवस्थाको बारेमा एक साताभित्र बृहत् छानबिन गरी प्रतिवेदन पेश गर्न आग्रह गरेका छन् ।(रासस/एएनआई)