हामी सबैकाे संसारन्यूज

मनिषकुमार शर्मा समित, भक्तपुर

लगातारको ढोकामा आएको ढकढक आवाजले ऊ ढोका खोल्न बाध्य भयो ।

“के होला ? कसलाई खोज्नु भयो कुन्नि ?” अपरिचित अनुहार देखेर उसले प्रश्न गर्यो ।

“नमस्कार । यसो वास पाइन्छ कि भनेर दुः ख दिएको ।”

“साँझको पाहुना देउता भन्छन् हजुर तर….”

“तर के …?”

“के थरी पर्नु भयो ? हाम्रो पानी चल्छ कि चल्दैन कुन्नि ?” उसले अलि हच्किदै सोध्यो ।

“हैट ! के कुरा गर्नु भएको । अहिलेको जमानामा पनि जातभातको कुरा । छाडिदिनुस् यी कुरा ।” पँहुनाले आँफूलाई अलि उदार देखाए ।

भालेको पहिलो डाकमै उठेर पाहुना विदा भए । पाहुना विदा भए लगत्तै ऊ पनि पँधेरोतिर लाग्यो । त्यहाँको दृष्य देखेर मुसुमुसु हाँस्यो । उसको अथितिदेव त मन्त्र जप्दै आफ्नो कुम्लोकुटुरोमा सुनपानी छर्कदै, हतारहतार खल्को हाल्दै थिए ।