हामी सबैकाे संसारन्यूज

भूपाल अधिकारी, बिराटनगर

इन्साफ जहाँ धनमा बेचिन्छ कुरा बुझ्नू
लाचार त्यहाँ जिउँदै मारिन्छ कुरा बुझ्नू

ताकेर गरिबका झुपडी माथि जुनै बेला
आगाको निकै लप्का बर्सिन्छ कुरा बुझ्नू

निर्धक्क युधिष्ठिर जस्तै सत्य सधैँ बोले
निश्चित छ यहाँ जिब्रो काटिन्छ कुरा बुझ्नू

मारिन्छ जता सेता एकेक परेवा नै
सुख शान्ति त्यतै जहिल्यै भाँडिन्छ कुरा बुझ्नू

ऊ प्रेमको सागरमा किन डुब्छ फगत एक्लै
हर एक डुबेको चिज उत्रिन्छ कुरा बुझ्नू

बदलेर नरम बन्नुस् भेडाको भुवाजस्तै
थाहा छ कडा चिज नै भाँचिन्छ कुरा बुझ्नू

बहर : हजज मुसम्मन अखरब
अर्कान : मफ़ऊल मुफ़ाईलुन मफ़ऊल मुफ़ाईलुन
वजन : २२१ १२२२ २२१ १२२२