हामी सबैकाे संसारन्यूज

स्वर्ण शिखा, दाङ

यहाँ छैनन् केही सुखसयलका साधन भनी
कुनै छैनन् नौला अवसर भनी धीर नबनी ।
हतारोमै गर्छौ किन वतन छोड्ने मनसुवा
तिमी नै अल्पेमा मुलुक कसरी चल्छ र युवा ।।१

खनी खोस्री बारी मलजल गरी रोप अदुवा
हलेदो कोदो जौँ छर गहुँ मकै गाजर उवा ।
गरी खेतीपाती अब मुलुकभित्रै चर युवा
किनेको आटोले कति दिन भुँडी भर्छ र युवा ।।२

गरेनन् नेताले नभन अघि आफैँ बढ तिमी
समस्या जे देख्छौ सबसित स्वयम् नै लड तिमी ।
लिँदैँ जिम्मेवारी कस अब छिटै कम्मर युवा
गुनासोले मात्रै मुलुक कसरी बन्छ र युवा ।।३

ठुलो सानो भन्दै श्रमबिच तिमी भेद नगर
खियाऊ ती नङ्ग्रा अब इलम जे छन् सब गर।
नरोपी माटोमा कुसुम कुन पो खिल्छ र युवा
बसी अल्छी गर्दै रसद कसरी मिल्छ र पुवा ।।४

कि ल्याऊ आफैँले सुगम पथ कोर्ने मत कुनै
कि देखाऊ नौलो पथ प्रगतिको उत्तम कुनै ।
गरी खेदो मात्रै गलत स्थिति सुध्रिन्छ र युवा
सधैँ राँको बाल्दा गति मुलुकले लिन्छ र युवा ।।५

छन्द : शिखरिणी
गण : य म न स भ ल गु
गण सङ्केत : lSS SSS lll llS Sll l S