हामी सबैकाे संसारन्यूज

बिमला चन्द सानू
बैतडी, हाल- काठमाडौं

मैलो के छ र देख्न सक्छ कसले छन् खास के कारण
सेता शैल समानका तनहरू होलान् र निर्धारण
भाग्दैछन् छलछामको विषयमा के भोग गर्छन् कति
जान्दैनन् किन सार खेल भवको मान्छे भएका जति ।१।

लाखौं लाख करोड जीव जगमा जान्छन् तथा आउछन्
गर्छन् कर्म र भोग्दछन् सब कुरा खै स्वाद के पाउँछन्
काट्छन् भाग लगाउछन् जमिनका तेरो र मेरो भनी
गर्छन् युद्ध र जित्दछन् समरमा के मिल्छ स्वार्थी बनी ।२।

कोही मानिस हास्तछन् गजबले भुल्छन् बसेको घर
चल्छन् जाँगर द्वेष राग रिसमा मान्दैन रत्ती डर
बर्सिन्छन् जब अश्रु घोर बलले के न्याय होला भनी
कालो कोट तराजुका कपटमा लुक्दैछ पासो बनी ।३।

झाक्री फुक्छ बदल्छ रूप वयको ठान्दैछु द्यौता छ की
ज्युँदै छन् नरमा पिशाच मनका चल्दैछ रे ढुक्ढुकी
छन् आडम्बर चेतना पशु जसै हाँस्ने भए दर्पण
ज्यादै राम बनेर भन्छ म निको बाकी सबै दुर्जन ।४।

जो छन् आज करोडका महलमा हिँड्छन् नि मागी भिख
चिल्ला कार चढी कतै अदबमा बोक्छन् उनै तारिख
यस्तै आज र भोलीको समय हो थाहा हुँदै हुन्न है ?
राखी स्वार्थ अनर्थ त्यो मगजमा को चन्द्रमा छुन्छ है ?५।

छन्द : शार्दूलविक्रीडित
गण : म स ज स त त गु
गण सङ्केतःSSS llS lSl llS SSl SSl S