Sansar News
सत्यराज जोशी “पङ्कज”
बेलौरी, कञ्चनपुर
के प्रेमवस्त्र भन्छौ कात्रो लगाउँदै छु
आफ्नो निमित्त आफै चौको सजाउँदै छु
उपहार उसको खाली पाना थियो त्यसैमा
सम्झेर रूप उसैको तस्बिर बनाउँदै छु
कालो भ्रमर थुँगामा हाबी हुँदै छ भन्छन्
उसकै निमित्त अहिले ओषध छिटाउँदै छु
जुन फूल मेरो लागि उम्री हराभरा भो
त्यै फूल रोप्नलाई बारी पन्याउँदै छु
लज्जा सबै हराई घुम्छ्यौ अरे सडकमा
साह्रै दरिद्र रहिछ्यौ पहिरन पठाउँदै छु
बहर -मुजारे मुसम्मन अखरब
वजन -२२१ २१२२ २२१ २१२२
काफिया -आउँदै
रदिफ – छु
वि.सं.२०८१ पुस ६ शनिवार ०५:३८ मा प्रकाशित
