हामी सबैकाे संसारन्यूज

कृष्णप्रसाद पौडेल ‘जस्ताघरे’
बट्टार, नुवाकोट

करोड लाख पिण्ड छन् त्याहाँ विशाल व्योममा ।
लिएर ज्योति सूर्यको प्रकाश छर्छ चन्द्रमा ।।
सयौँ नदी र पोखरी मिलेर बन्छ सागर ।
अपार जीत मिल्नुमा यथेष्ट हुन्छ जाँगर ।। –१

उडेर झट्ट वाष्पले म बन्छु भन्छ बादल ।
घसेर ओठ दाँतमा सुहाउँदैन गाजल ।।
खराब सोच तर्कले विचार हुन्न सक्कल ।
र ढङ्गशून्य व्यक्तिले बजाउँदैन मादल ।। –२

हिरा छ पूर्ण चम्किने प्रकाश दिन्छ रातमा ।
खुलेर हाँस्न सक्छ है हिमालले प्रभातमा ।।
विवेकहीन पुत्रले खुसी दिँदैन ओठमा ।
दुसाध भ्रष्ट व्यक्तिले कुदृष्टि छर्छ देशमा ।। –३

अनेक वाद चाल छन् विशेष खेल झेल छन् ।
विभिन्न मान सानमा बसेर लुट्न पोख्त छन् ।।
दरिद्र जीर्ण व्यक्तिका पुकार सुन्न सक्छ को ?
दशा अभाव रोगको र दूर गर्न सक्छ को ? –४

असभ्य मूर्खले यहाँ विकार बीज रोप्दछ ।
कुकर्मका प्रहारले धरा दरार पार्दछ ।।
निमेषको चट्याङले विभ्रान्त रूप ल्याउँछ ।
घमन्ड छुद्र कर्मले प्रसिद्धि नाश गर्दछ ।। –५

हुरीबतास स्याँठले बिगार गर्छ सर्वको ।
विचारहीन व्यक्तिले सखाप पार्छ मर्मको।।
सभा र भेटका कुरा गरेर मक्ख पार्दछ ।
कराल काल भाटले समस्त सर्त तोड्दछ ।। –६

छन्द : पञ्चचामर
गण : ज र ज र ज गु
गण सङ्केत : M ISI – SIS – ISI – SIS –  ISI  S