हामी सबैकाे संसारन्यूज

रामशरण न्यौपाने, भक्तपुर

पस्दा जङ्गलभित्र मार्ग गतिलो पाइन्न चारैतिर
बस्छन् हिंस्रक जन्तु धेर बिचमा पारेर ठाडो शिर
झम्टिन्छन् बनजन्तुले मनुजको सौगन्ध पाए पछि
को पो पुग्छ कुबेरको सहरमा बाटो बिराए पछि?।।१

बाटोमा कति छन् जँघार र नदी ठाडा उकालाहरू
काँडाका ननिका बडा जहरिला गाडिन्छ भालाहरु
निर्धा भाइ र बन्धुका पिठिउँमा भारी भिराए पछि
को पो पुग्छ कुबेरको सहरमा बाटो बिराए पछि?।।२

व्यापारी जन खोज्छ दाउ जहिले नाफा लिने बेसरी
खर्ची लाख कडोर धुत्छ उसले पारेर फन्दा घरी
टोलीमा पथभ्रष्ट मूल अगुवा मानी छिराए पछि
को पो पुग्छ कुबेरको सहरमा बाटो बिराए पछि?।।३

सच्चा मानव वृक्षतुल्य भरिला हुन्छन् नुहेका अति
गर्दैनन् तिनले कुनै तरहले कोही कसैको खती
ज्ञानीले पनि साथ छोड्छ खलले साह्रै पिराए पछि
को पो पुग्छ कुबेरको सहरमा बाटो बिराए पछि?।।४

मान्छे नायक बन्छ लोक हितको रफ्तारमा दौडिने
आफैँ उन्नतिको बनीकन दियो भूलोकमा चम्किने
कल्ले मान्छ कुकर्मबाट मुहुडा आफैँ गिराए पछि
को पो पुग्छ कुबेरको सहरमा बाटो बिराए पछि।?।।५
छन्द : शार्दूलविक्रीडित
गण :म – स – ज – स – त – त – गु
गण सङ्केत : SSS – IIS – ISI – IIS – SSI – SSI – S