हामी सबैकाे संसारन्यूज

कविराज घिमिरे,चाँगुनारायण भक्तपुर

संस्कारयुक्त जनले नित बास पाउन्
फैलेर शान्ति करुणा सबका पलाउन्
मायाँ अपारसँगले शिशु नित्य पाउन्
मातापिता निधि दुवै घरमै रमाउन् ।१।

त्योमात्र जीवनपला कहिँनेछ साँचो
टर्छन् जहाँ असुविधा कति हुन्न खाँचो
सन्तोषको चउरमा कुल खेल्न आउन्
मातापिता निधि दुवै घरमै रमाउन् ।२।

जाउन् सुता सुत परै अभियान बोकी
ल्याउन् परिश्रम गरी नगदी र जिन्सी
भण्डार भर्न सकियोस् सबले कमाउन्
मातापिता निधि दुवै घरमै रमाउन् ।३।

लन्ठा अनेक जति छन् सुतबाट टारुन्
राखी विवेक सबले मन उच्च पारुन्
सद्भाव झल्किन अरू विरुवा लगाउन्
मातापिता निधि दुवै घरमै रमाउन् ।४।