Sansar News
भूपाल अधिकारी,विराटनगर
हेपेर भन्छ जसले निर्धन गँवार हुन्छ
उसको त्यही मगजमा थुप्रै विकार हुन्छ
जुन वस्तु हुन्छ उत्तम व्यापार बढ्छ त्यसको
कमसल छ माल भन्ने धेरै प्रचार हुन्छ
हिँड्ला गरेर माया जो मात्र एकतर्फी
साँच्चै उही हमेसा दिलको बिमार हुन्छ
मान्छे जहाँ हुनेछन् आत्मा लिलाम गर्ने
हर चिज त्यहाँ सधैंभर बिक्ने बजार हुन्छ
कानुन छ खुब अनौठो हाम्रो यसै मुलुकमा
निर्दोष जेल पर्दा दोषी फरार हुन्छ
बहर : मुजारे मुसम्मन अखरब
अर्कान : मफ्ऊल , फाइलातुन् मफ्ऊलु फाइलातुन्
वजन : २२१ – २१२२ – २२१ – २१२२
काफिया : आर
रदिफ : हुन्छ
अभ्यास : परिश्रमी पाठशाला
वि.सं.२०८२ चैत २१ शनिवार ०७:०४ मा प्रकाशित
