हामी सबैकाे संसारन्यूज

कविराज घिमिरे,चाँगुनारायण भक्तपुर

प्रजातन्त्र हाम्रो छ साँचो बिगार्ने
अरू नाङ्गिँदा झन् छ नेता सिँगार्ने
भरौटे चरौटेहरूकै छ मोज
भएको छ जन्ताहरूको बिजोग ।। १

यहाँ बोल्न पाइन्छ पाइन्न खान
वृथा लेख्न मात्रै भयो वर्तमान
छ जो लुट्न सक्ने उसैको छ गान
सिधा बन्न खोज्ने सबै छन् चिहान ।। २

विदेशी दलाली बनी हुन्छ उच्च
मिलेको छ हन्डी पुगेको समुच्च
यहाँ धर्म माऱ्यो प्रजातन्त्र आई
छ सर्वत्र सर्पो हराएर गाई ।। ३

न भाषा रह्यो वा न संस्कार बाँच्यो
उता मर्छ बाबा यता पुत्र नाच्यो
हरे ! आँगनीको प्रजातन्त्र कस्तो ?
न बाँचिन्छ खाँदा बिसैलो छ यस्तो ।। ४

प्रजातन्त्रले देश हाँसोस् हँसाओस्
खुसीसाथ जन्ताहरूमा नचाओस्
बनुन् दास नेता सबैका उपल्ला
चुलोमा सबैको तबै अग्नि बल्ला ।। ५

छन्द : भुजङ्गप्रयात
गण: य – य – य – य
सङ्केत: ISS – ISS – ISS – ISS
विश्राम : ६/६ (६ र १२ अक्षर) मा