हामी सबैकाे संसारन्यूज

दीनानाथ पोखेल
सुम्बेक, इलाम -२, इलाम

वृद्धले मनुजता अगि बाँडे ।
कष्ट ताप मनका सब फाँडे ।।
भोग्नुहुन्न उनले अवहाल ।
वृद्धका सकसको गर ख्याल ।।०१।।

झर्किईकन तिमी यदि बोल्छौ ।
वृद्धमा जहरको कस घोल्छौ ॥
मान गर्नु कसरी बुझ हाल ?
वृद्धका सकसको गर ख्याल ।।०२।।

हातपाउ उनका कम चल्छन् ।
श्रव्य दृश्य बल यी पनि गल्छन् ।।
ज्ञानवान् मनुजको गति चाल ।
वृद्धका सकसको गर ख्याल ।।०३।।

पथ्य योग्य विनयीपन पस्क ।
वाक्क दिक्क छु भनेर नठस्क।।
मिष्ट बात गर दर्द पखाल ।
वृद्ध‌का सकसको गर ख्याल ॥०४।।

चल्छ बासन मिठो बन नम्र ।
बढ्छ शक्ति मनको छुन चन्द्र ॥
दिल्लगी नगर बोझ नहाल ।
वृद्धका सकसको गर ख्याल ।।०५।।

उठ्न बस्न सजिलो छ कि छैन ?
हेर्न भुल्नु मन जान हुँदैन ।।
बात तीक्ष्ण कथुरेर नगाल ।
वृद्धका सकसको गर ख्याल ॥०६।।

छन्द : स्वागता
गण ; र – न – भ – गु – गु.
सङ्केत : SIS – III – SII – S – S