हामी सबैकाे संसारन्यूज

अलख निरञ्जन लोहार
टीकापुर, कैलाली हाल : भारत

जो जो छन् नित भाव तुच्छपनका,देखिन्छ छाडा गति,
व्यर्थै मानिस रूप जन्मिन गए,छन् जन्तुजस्तै मति,
बन्छौँ बाँदरझैँ भने जब यहाँ ,मान्छे कहाँ बन्छ र ?
बा आमा परिवार बिर्सिन गए,सत्कर्म के हुन्छ र ?१?

दर्जा उच्च लिई बने अगतिला , आत्मा भए श्वानको,
सानो चित्त गरेर जीवन कहाँ, बन्ला सधैं सानको ?
राम्रो ज्ञान लिएर निर्मल हुँदा , फल्छन् सदिच्छा गति,
राक्षसी सुत जन्मियो यदि भने,गर्छन् धराको क्षति ।२।

छन् दुर्भाव अनेक भित्र दिलका, राखौँ सफा सुग्घर,
कालो कल्मष फाल्न सक्छ जसले, होला खुबै सुन्दर,
थालौँ गर्न सुकर्म आज सबले,लुक्दै बसेका पनि,
सक्दैनौँ यदि थाम्न धर्म कहिल्यै,के काम हाम्रो जुनी ।३।

बाडौँ मानवता परार्थ हितमा, साँच्चै भलो सोच्नुछ,
गर्दै धारण शान्तिका नियतले, सत् भावना रोज्नुछ,
हो संस्कार ठुलो यहाँ भुवनमा, जानौँ सबै शुद्धता,
को पो सक्छ नकार्न लोक भरमा,सत्कर्मको मान्यता ।४।

मैलो फाल्न सके सबै हृदयका, होलान् यहाँ मानव,
अर्काको उपहासमात्र गरिँदा, बन्छन् अझै दानव,
सोच्नैपर्छ सदा भलो र कुभलो,सापेक्ष मान्छे हुन,
बुझ्दैनौ यदि मर्म भाव कहिल्यै, पर्ला सधैँ नै रुन ।५।

छन्द : शार्दूलविक्रीडित
गण : म – स – ज – स – त – त – गु
सङ्केत : SSS – IIS – ISI – IIS – SSI – SSI – S