हामी सबैकाे संसारन्यूज

आफ्नै सम्मानमा पनि पाखुरा सुर्कन्छौं ।
फुर्काईदिंदा फुर्कन्छौं ।
जीउ जीउ गर्दै बिषदिए,
ईख भुलि पिईदिन्छौं ।
प्रगति गर्न पराई सहारा चाहिने,
आफ्नो सोंच, बुद्धिले
काम गर्न गोडा काम्ने,
अरुले सही भनिदिए,
असल खराबको विवेक भुल्ने
पराश्रित, तिमी अनि म ।

विश्व आज परिवर्तनले घेरिसक्यो ।
विज्ञानले बेरिसक्यो, संसार नयाँ हेरिसक्यो ।
अझै पनि कुरा गर्छौं छुत अछुतको ।
सानो अनि ठूलो जातको ।
आफै बुझ्ने छौं र पनि,
बुझाईदिनुपर्ने अरुले नै ।
अबुझ बुझ्ला बरु
बुझ पचाउनेलाई सकिन्न ।
साँचो कुरा बोल्न हिच्किचाउने,
हुतिहारा, तिमी अनि म ।

हाम्रो यस्तै बुझ पचाउने बानीले,
फाइदा लिदैछन् अरुले ।
दशगजामाथि टेकी,
मानवताको भाषणसँगै,
हमला बोल्दैछन् अरु ।
यदि हामी निर्धा होईनौं भने ।
कायर होईनौं भने ।
उठौं अब बिरुद्धमा,
तिमी अनि म,
हामी बनेर ।।।